Phah tuklar ki seng trok ha ka Sorkar ïa ki jingdawa ba sahteng na ki karkhana dewbilat

Shillong, Naiwieng, 16: Ka Joint Action Committee (JAC) kaba kynthup ïa ka East Jaiñtia Hills Truck Owner & Transporter Association (EJHTOTA) bad ka Jaiñtia Hills Truck Owners Association (JHTOA) ka la kyntu ïa u Symbud Myntri Rangbah uba khmih ïa ka tnat Transports u Bah Sniawbhalang Dhar bad ïa u Symbud Myntri Rangbah uba khmih ïa ka tnat Kam Pohing u Bah Prestone Tynsong ba kin tuklar lem halor ka jingdawa ba dang sahteng na ki karkhana pynmih dewbilat kiba don ha East Jaiñtia Hills District.
Ha ka jingïalang kaba la long ha ka 31 tarik, Risaw, 2025 ka MCTODA ka la dawa ïa ki trai karkhana ban kyntiew ïa ka bhah kit nong jong ki trok trai jylla ym tang 100 tylli hynrei 120. Pynban, na ka liang jong ki trai karkhana kiba don hapoh ka shatri jong ka Jaiñtia Hills Cement Manufacturers Association (JHCMA) ki la pan por ba kin sa shong pyrkhat halor kane ka kam.
Kum ban shu kdew, ka MCTODA ka la ai por shi taiew ïa ka JHCMA ban shim rai halor katei ka jingdawa khnang ban pynkut noh shisyndon ïa ka jingïakynad hapdeng ki trai trok bad ki bor pynïaid jong ki karkhana.
Ha u kyrwoh ba la soi da u Chairman u Bah Biangshwa Shylla bad u Secretary u Bah Kyrshan Dkhar ki la pynpaw ruh ïa ka jingsngewnguh ïa ki arngut ki Symbud Myntri Rangbah, u Bah Sniawbhalang Dhar bad ïa u Bah Prestone Tynsonghalor ka jingshim khia jong ki ban pynbeit bad pynkut noh ïa ki jingeh kiba la mih ha kine ki khyndiat taiew ba la dep na ka jingpynlong ka Meghalaya Commercial Truck Owners and Drivers Association (MCTODA) pyrshah ïa ki karkhan dewbilat kiba don ha rilum Jaiñtia khnang ban pynbor ïa ki karkhana ba ki pynkiew ïa ka bai kit dewbilat bad ïa u clinker.
Ka JAC ka la ong ba ki mat jingdawa kiba ka MCTODA ka la dawa ki dei ruh kijuh ki mat kiba ka la ïai dawa na ka por sha ka por na ki kharkhana dewbilat bad ïa ka Sorkar Jylla.
Dang shen ha ka jingïalang, ki trai karkhana ki la mynjur ban pyntreikam ïa ka jingpynbna ba la pynmih da ka Sorkar Jylla kata ban siew noh ïa ki trok T.9 na ka bynta shi kilomitar shi metric tonne ka bai kit.
“Katba, ïa kiwei kiwei pat ki mat jingdawa kiba dang sahteng, ki trai karkhana ki la pan por shitaiew ban wanrah pat ïa ka rai jong ki ha ka jingïalang ka ban sa long ha ka 21 tarik mynta u bnai,” la ong u kyrwoh.
“Ha kaba ïadei bad ki mat jingdawa ïa kiba ym pat shym la lah ban ïakren pynbeit ha ka jingïalang kaba dang shu dep long shen, ka JAC, sa shisien ka kyrpad biang ïa ka Sorkar Jylla lyngba ki arngut ki Symbud Myntri Rangbah ba kin tuklar biang na ka bynta na ka bynta ka hok bad ka jingmyntoi jong ngi kum ki trai ri trai muluk ha jingïalang kaba yn sa pynlong biang,” la kyntu ka JAC.