Shillong, Risaw 21: Ki nongmihkhmat jong ka Nongtluh Mathan Maramian Development Forum (NMMDF) ha ka jingïalam da u MLA ka UDP na Nongpoh Constituency u Bah Mayralborn Syiem ha ka sngi baar ki la kyrpad ïa ka jingtuklar lem jong u Symbud Myntri Rangbah uba khmih ïa ka tnat home (police) u Bah Prestone Tynsong ban pynkloi noh ïa ka jingthaw ïa ka community & rural development (C&RD) block ba thymmai ha Umden kaba ha Ri Bhoi district.
“Ngi da angnud ban kyrpad ïa phi ban pynskhem bad ban pynsted noh ïa ka jingthaw ïa ka Umden C&RD Block, khnang ba kane kan wanrah ka jingkylla ba la angnud la slem bha da ki paidbah na ka bynta ka roi ka par kaba neh shyrta ïa ki pateng ban wan,” ong ka NMMDF ha ka dorkhas ba la aiti sha u Bah Tynsong ha ka jingïalang kaba la long hapoh ka kamra treikam jong u.
Haba kren sha ki lad pathai khubor, u MLA ka Nongpoh u la ïathuh ïa ki jingeh ba la mad da ki paidbah na ka daw jong ka ïar palat ka jingtreikam kaba ha ka Umling Block, kaba kynthup ka jingai jingshakri kaba malu mala kumba 224 tylli ki shnong, ha kaba kane ka wanrah ka jingeh ïa ki nongïalam shnong, ki self-help group, bad ki nongshong shnong ban ïoh ki jingshakri kiba kongsan bad kumjuh ruh ki kam synshar khaddar.
“Ka thaiñ Nongtluh Mathan Marmain ka hab ki jingtreikam palat 130 tylli ki shnong, ha kaba kiba bun na ki, ki jngai kumba palat 80 kilometer na ka Umling C&RD Block headquarters kaba shim por ha ka leit ka wan kaba long haduh 160 kilometer,” ong u Bah Syiem da kaba bynrap ba jan 60% na kine ki shnong ki don ha u zero line ba shi lynter u pud u sam bad ka Kamrup Metro District ha Assam, haba ki la hap ruh ban ïaid lyngba ki lynti kiba sniew bad ki jingma kiba ju mih ha jaka khappud kiba long ruh ki daw ka jingpoi slem ki kam ai jingshakri bad ki jingsynshar khaddar.
Ban pynbeit ïa kine ki jingeh, u Bah Syiem u la ong ba ka forum ka la ithuh bad ïoh ruh ka jingïateh haba ïadei bad ka jaka na ka bynta ka jingtyrwa ïa ka C&RD Block ha Umden, kaba la noh synniang da ka Raid Nongtluh-Umden khlem da donkam siew.
“Ka jingwanrah ïa ka C&RD Block ha Umden ka ïeng kum ka sienjam ban wanrah ka jingkylla bad khamtam ha ka synshar khaddar, nangta ki kam pynroi ki ban wan da ka synshar paidbah, bad kan kyntiew ruh ïa ka bha ka miat jong baroh ki liang ïa ki nongshong shnong kane ka thaiñ,” bynrap shuh shuh u MLA.
Haba kylli, u Bah Syiem u la ong ba kiba la leit ïa kynduh ïa u Symbud Myntri Rangbah ki la ïoh ïa ka jubab kaba bha haba ïadei bad kane ka jingdonkam.
“Ngam bakla ban ong ba ka jingangnud ba la ai da ka sorkar ha ki por ba la leit kumba ka la paw ha madan, ki paidbah ki la ngeit ba kane kan urlong shisha bad ngam bakla ruh ba ïa kane ka sorkar kan sa sngap bad da ka jingai jingmynjur kaba khlaiñ jong u Symbud Myntri Rangbah nga kyrmen ba ha ki sngi ban wan ngin sa ïohi ïa ka jingwanrah bad thaw noh kloi ïa kane ka C&RD Block ba thymmai kaba la tyrwa ka Umden C&RD block,” u la ïathuh.
