Shillong, Risaw, 01: Ka Non-Teaching Staff Association of North-Eastern Hill University (NEHUNSA) ka la phah tuklar ha u Myntri ka Sorkar Pdeng uba khmih ïa ka tnat Pule Puthi u Dharmendra Pradhan halor ka jingpynslem ban pynlong ïa ka jingïalang Executive Council jong ka skulbah NEHU.
Ha ka shithi ba la phah sha u Pradhan, ka NEHUNSA ka la ong ba ka Executive Council ka dei ka Governing bad Executive Body ba hakhlieh tam jong ka skulbah bad ki jingïalang jong ka ki long kiba kongsan bha na ka bynta ban pynbeit ïa ki mat bapher bapher ha ka liang ka jingpule bad ka jingpynïaid kam, kynthup ïa ka jingpynrung kam ïa ki nongtrei bym dei ki nonghikai. Ka jingpynslem ban pynlong ïa ka jingïalang ka la khanglad ïa ka jingïaid shaphrang jong ka skulbah, namarba ym lah ban pynskhem ne pynbeit ïa ki rai khlem da ai jingmynjur da ka Council.
Ka Association ka la kynthoh ruh ïa u Vice Chancellor Prof PS Shukla halor ka jingjah jong u na ka kam kaba la neh la jan shisnem eiei.
Katkum ki aiñ jong ka NEHU, u Pro Vice-Chancellor ba la kham slem u dei ban pyndep ïa ki kamram jong u Vice-Chancellor ha ka por ba um don.
Ka NEHUNSA ka la kyrpad ba u Pro Vice-Chancellor uba kham shlem ha ka kam un pynïaid ïa ka jingïalang jong ka Executive Council, namar ka jingbym don jong u Prof. Shukla ka pynlong ïa u ban lah satia ban pynlong ïa ka jingïalang.
Ka Association ka la kdew ïa ki aiñ jong ka NEHU bad ïa ka shithi na ka tnad Pule Puthi, kaba ong ba baroh ki jingïalang ba thikna kynthup ïa ki jingïalang jong ka Executive Council dei ban pynlong hapoh ka jaka pule jong ka skulbah.
Ka la kynthoh ba u Prof. Shukla um lah ban pynïaid ïa kino kino ki jingïalang ba la buh da ka aiñ, kynthup ïa ka jingïalang jong ka Executive Council, namar ka jingbym don jong u ha ka kam.
“Halor ka nongrim jong ka aiñ bad ka shithi ba la kdew haneng u Prof. P. S. Shukla um lah ban pynïaid ïa kino kino ki jingïalang katkum ka aiñ. Ka NEHUNSA ka la pynsngew da kaba shai sha ka ophis jong u Myntri ka tnat Pule Puthi ba dei ban aiti ha u Pro Vice-Chancellor uba la kham slem ha ka kam ïa ka kamram ban pynïaid ïa ka jingïalang jong ka Executive Council kaba la khmih lynti la shlem,” la pynpaw ka NEHUNSA.
Shuh shuh, ka NEHUNSA ka la pyntip ruh sha ki nongïalam ba kham pawkhmat, ba kynthup ïa u Rahul Gandhi uba long u Nongïalam ka Liang Pyrshah ha Lok Sabha, ïa u MP ka Shillong u Dr. Ricky AJ Syngkon bad ïa u MP ka Tura u Saleng A Sangma halor kane ka mat bad kyrpad ruh ba kin tuklar lem halor kane ka kam.
