Phah tohkit u Myntri ban lap ïa ki jingshisha halor ka jingkynnoh thied thok ïa ki tin sopïing

Shillong, Jylliew 24 : Ka sorkar jylla ka la thung da ka jingtohkit (Departmental Inquiry) ban sei pyrthei lut ïa ki jingkynnoh ba ka don ka jingsam da ki tin sop Ïing ki ba stang sha ki paidbah ka jylla lyngba ki Block.
Ïa kane la ïathuh da u Myntri ka tnad Housing ka sorkar jylla, Marcuise N Marak da kaba pyntip ruh ba kane ka jingtohkit kadei halor ka jingujor da ka seng HYC ba ka don ka jingsam da ki tin stang sha ki paidbah.
“La dep bthah ïa ka Department ban pyndep ïa ka jingtohkit hapoh ka 30 – 35 sngi bad ban phah ruh ïa ka kaiphod,” ong u Myntri haba kren bad ki lad pathai khubor.
Shuh shuh u ïathuh ruh ba ka Department ka la shim noh da ki tin aluminium ha ka jaka jong ki CGI namar ki kham bha bad ki kham neh slem lada nujor bad ki tin sopïing ne ki CGI Sheet.
U Myntri u pyntip ruh ba la bthah ïa u Joint Secretary ka tnad Housing ba ryngkat bad ka Technical Team ba kin leit jurip sha baroh ki kudam buh tin sop ïing ba don ha ka jylla. “Lada ngi lap ba ka don shisha ka jingleh thok ngin sa leh da kaba tyngeh pyrshah ïa ka kompeni bad ruh ngan pyntikna ba lada jia ba ki don ki nongtrei kiba donkti, kin ngat lang,” u la bynrap shuh shuh.
Ha kajuh ka por, u Myntri u la ong ruh ba hadien ka jingtohkit lada lap ba don ka jingleh thok na ka tnad ka lah ban buh dak saw syndon ïa ka kompeni.
U Myntri haba jubab halor ka jingkylli u la ïathuh ba katkum ka jingpan jong ka tnad, ka jingrben jong ka tin kadei ban long 0.45 mm
Lah ban kdew hangne ba ka HYC ha ka taiew ba la dep ka la phah ka jingujor sha u Myntri Rangbah ka jylla u Conrad Sangma, u Symbud Myntri Rangbah u Bah Prestone Tynsong bad sha u Myntri ka tnat Housing u Marcuise N Marak, ba ka don ka jingkhñium na ki paidbah halor ka jingstang palat ki tin sopïing ba sam sha C&RD Block bad ruh sha ki katto katne kiba ïoh myntoi ha Khasi-Jaiñtia Hills.