Phah tohkit ka sorkar ba phah sah ïa ki nongïalehkai ha ki kamra ba jaboh

Shillong, Jymmang 05: Ka sorkar jylla kala pynmih ka hukum ban phoh tohkit halor ka jingbym biang ha ka rukom pynkhreh ban pynbit pynbiang na bynta ki nongïalehkai kiba ïashim bynta ha ka lympung ïalehkai 4th Meghalaya Games kaba long ha nongbah Shillong.
“Ngi la hukum ban tohkit halor kane,” ong u Myntri Rangbah ka jylla u Conrad K Sangma haba kren sha ki nongthoh khubor ha ka sngi Palei.
Kum ban pynkynmaw hangne u Myntri Rangbah ha ka miet jong ka sngi Nyngkong hadien ba la saphriang ki dur ha ki social media u la leit ban jurip hi dalade ha JN Sports Complex halor ka jingpynkhreh ban pynbit pynbiang na ka bynta ki nongïalehkai kiba ïashim bynta ha ka Meghalaya Games 2022.
Hynrei watla katta u Myntri Rangbah u la ong ba ym don kano kano ruh kaba biang lut. “Ïa kane ka jingïalehkai la ïoh ban pynlong biang hadien bun tylli ki snem bad ka Meghalaya State Olympic Association (MSOA) kala trei shitom bha ban pynlong ïa kane ka lympung,” ong u Myntri Rangbah.
U Myntri Rangbah u la ïathuh ruh ba ka don ka jingbym biang bad ka jingduna ha kaban pynlong ïa ka Meghalaya Games.
“Hynrei nga ngeit skhem kaba kongsan tam ka long ban ïoh jinghikai na kaei kaba la bakla kaban pynthikna ïa u ne ka briew kiba don ka jingkitkhlieh ban pynbeit ïa kaei kaba bha tam.”
U Myntri Rangbah u la kyntu ruh ïa ki paidbah ba kim dei ban pynleit jingmut tang ha kane kawei ka jingbakla kaban pynduh mynsiem noh pat ïa ka jingkongsan jong ka Meghalaya Games. “Ngi hap ban sngewthuh ba haduh 2,600 ki nongïalehkai ki wan ban ïashim bynta bad ngi dei ruh ban sngewthuh ba kane kala long biang ha ka sien kaba saw ha ki 50 snem,” u la bynrap.
U la pynpaw ruh ba ka donkam ban pynleit jingmut ha kiei kiei kiba bha bad pynkut da kaba pynthikna bad ong, “Hooid ngi ïoh jinghikai na kiei kiei kiba bakla, ngi donkam ban nang kham pynjanai ïa kiba kum kine ki jingjia khnang ba kin ym jia shuh hadien habud.”