Shillong, Jylliew, 06: Ka Meghalaya Human Rights Commission (MHRC) ka la pynmih ïa ka hukum ban pynlong ïa ka jingtohkit halor ka jingïap jong kawei ka longkmie armet ba dang pun ïa i khun ha kpoh ha Maternal and Child Health Hospital, Jowai, West Jaiñtia Hills District.
Ha ka sngi Thohdieng, u Secretary jong ka MHRC u la pyntip ba ka Commission ka la shim suo motu halor ka jingïap jong ka longkmie ba dang armet bad i khun ba dang pun kumba la paw ha ka jingpathai khubor mynta ka sngi kaba ong, ““Jowai MCH under fire for pregnant woman’s death.”
“Ka Commission ka la phah da ka notice sha u Principal Secretary, Health and Family Welfare ka Sorkar Meghalaya, ban pynlong ïa ka jingtohkit bad ban phah ïa ka kaiphod kaba bnïah sha ka Commission ha ka tarik ba la buh,” u la bynrap.
Hynnin ka sngi Palei ki bor synshar jong ka West Jaiñtia Hills District ki la thaw da ka Enquiry Committee ban tohkit bniah halor ka jingïap jong ka Kong Pynchei Bareh ha Maternal and Child Health Hospital ha Jowai.
“Khnang ban lap ïa ki jingshisha bad ïa ki daw kiba lam sha ka jingjia ba sngewsih bad ban pynthikna ïa ka jingkhuid jingsuba, la thaw ïa ka Komiti ban pynlong ïa ka jingtohkit kaba bniah,” ong u DC ka West Jaiñtia Hilla u AK Singh ha ka hukum ba la pynmih.
Ka Kong Bareh, ka longkmie ba dang pun ïa i khun ha kpoh ka la ïap ha hospital ha ka sngi Balang.
Ïa ka komiti ba la khlieh da ka Additional Deputy Commissioner ka Kong B. Blah bad ki doktor na West bad East Jaiñtia Hills kum ki dkhot la bthah ba kan phah ïa ka kaiphod kaba bniah ha ka 9 tarik Jylliew.
