Shillong Nailur 24: U Symbud Myntri Rangbah ka jylla Bah Prestone Tynsong uba khmih ïa ka kam pohïing, ula phah ïa ka Special Investigation Team (SIT) ban tohkit bniah halor ka jingjia kaba la lam sha ka jingkhlad noh jong i heprit ba dang 4 snem ka rta i Insaphira Lyngdoh Mawnai ha Nongrah Nonglum.
Katkum ka jingong ka jongu ka long kaba donkam ban tih bniah ban lap ïa ka jingshisha ha kaba ïadei bad ka jinglong jingman jong ka jingiap jong i Insaphira Lyngdoh Mawnai
bad ban lap balei u khynnah uba 13 snem ka rta um shym la pyntip mardor shaphang katei ka jingjia lane balei u leh mynleh kum bym tip halor ka jingjia ïa i khynnah da kaba leh mynleh ban ïawad lang beit bad ki bor shnong.
“Nga lah dep ban bthah ïa ka Special Investigation Team (SIT) ban ngam jylliew shuh shuh halor katei ka jingjia kaba sngewsih kaba la jia bad balei utei u khynnah um shym la pyntip mardor shaphang katei ka jingjia. Balei ula sngap jar bad leh kum uto u bym bna eiei ruh” la ong u Bah Prestone haba ïakren bad ki nongthoh khubor.
“Ka kynhun ka dang ïaid shakhmat ha ka ban ngam jylliew halor ki jingshisha baroh, ïa kaba nga shimet hi nga sngew ba lada ka don kano kano ka jingbuhrieh kaba hangne hangtai” ula bynrap.
Ha ka 18 tarik u Nailur, u khynnah uba dang 13 snem ka rta, uba sah marjan uba ju leitkai man la ka por ha katei ka longïing kaba la mad ïa ka jingsngewsih, la dep ban rah hakhmat jong ka Juvenile Justice Board (JJB) ha kaba ula kubur ba ula ïalam ïa katei ka heprit sha ka jaka kaba dang don hapdeng ka jingshna, ïa kaba la lap ïa ka met ka jongka ha ka 15 tarik u Nailur.
Ka Insaphira Lyngdoh Mawnai kala jah na ka iingsah ka jong ha ka por 8 baje mynstep ha ka 14 tarik u Nailur.
Ka kynhun jongka Special Investigation Team (SIT) kala pynlong ïa ka jingtohkit hapoh ka jingïalam jong u SP (City) u Bah Herbert Kharkongor, kala pynpaw ba u khynnah ula ïalam ïa katei ka heprit sha ka jaka kaba dang don hapdeng ka jingshna, ha kaba ula ur bad ula ïoh ban tan lang ïa katei ka heprit bad kala iap jyllop na ka jingbakla (Accident).
Ha ka kaiphod jongka Post-Mortem kala pynthikna ba ka jingiap kadei na ka jingngam jyllop bad ym shym la lap ban don kino kino ki dak ki shin jong ka jingshah thombor ne ban shah leh khlem akor.
Ha ka jingtohkit jongka SIT u khynnah shynrang ula phla ba u ïalam ïa ka heprit sha katei ka jaka hynrei nyngkong u la pyrshang ban pynthame da kaba thaw ïa ka khana shaphang ka kali Scorpio rong ïong bad ki briew kiba kah ïa la ka durkhmat.
