Shillong, Jylliew, 04: Ki dkhot jong ka KSU Mawkasiang Unit ha ka sngi Thohdieng ki la ïohbat ïa uwei u bar jylla uba la bret ñiut pathar ha ka khlaw kaba don harud surok Mawdiangdiang mar pyrshah ïa ka Ingdorbar Thawaiñ ba thymmai ha ka por 8:00 baje mynstep.
Une u bar jylla uba ñiah ïa ka kali kaba don ïa u nombar ML-05 N-8784 u la wan dang step sha Mawdiangdiang ban bret ïa ki ñiut bad dei ha kum kane ka por ba ki dkhot ka KSU ki la lap pylleiñ pylleiñ ïa une u bar jylla.
Katba ki dkhot ka seng ki dang thmu ban bat, une u bar jylla u la phet bak da ka kali bad u la rung sha Institute of Hotel Management (IHM) bad ki dkhot ka KSU ruh khlem ailad ki la leit kthong ïa une u bar jylla bad tan ïa u na kane ka jaka pule bad ban ïalam biang ïa u sha kajuh ka jaka ba u la bret pathar ïa ki ñiut.
Ym tang katta, ki dkhot ka seng ki la bthah ïa une u bar jylla ba un tam biang ïa baroh ki ñiut bad ba un thep biang hapoh ka kali bad leit rah sha ka jaka ba u wan.
Lyngba une u kyrwoh, ka KSU Mawkasiang Unit ka la maham tyngeh ïa une u briew bad kumjuh ruh ïa kiwei pat ba kim bit ban pynlong jaka bret ñiut hapoh ka shnong ka thaw.
