Delhi, K’ Lyngkot 29: Ka Khasi Students’ Union (KSU) Delhi Unit hapoh ka jingïalam jong ka Samla Marbiang Khongwir President ryngkat bad ki dkhot ka Delhi ka la hiar mardor sha Delhi Airport.
Hadien ba la ïoh ka jingpyntip ba uwei u Samla shynrang Khasi u la khie ring kynsan hapoh katei ka Airport shwa ba un wan phai noh sha Nongbah Shillong.
Ki dkhot jong ka KSU haba ki la poi sha katei ka jaka ki bor ba dei peit ki la aiti ïa ka jingkitkhlieh baroh ha ki dkhot jong ka seng. Hadien kata, ki dkhot jong ka Union ki la ïalam noh ïa une khynnah sha hospital bad ki la pynthikna ba u la ïoh ïa ka jingsumar ha ka por kaba biang.
Hadien ba la pyllait noh ïa u na hospital, ïa une u khynnah la buh ban sah shwa ha Meghalaya House ha Delhi tad haduh ka jingwan poi ki bahaïing jong u na Shillong.
Ka President jong ka Seng ka Samla Marbiang Khongwir, ka la pynpaw ïa ka jingsngewnguh ïa u Dr Arshan Khongwir uba trei ha Safdarjung Hospital, na ka bynta ka jingïarap jong u ha hospital, kaba la ïarap shibun ïa ka Union ban pynbeit ïa kane ka jingjia bad ban pynthikna ïa ka koit ka khiah jong utei u khynnah.
Ka Khasi Students’ Union Delhi Unit ka la pynskhem biang ïa ka jingkut jingmut jong ka ban ïeng ryngkat bad ki dkhot jong ka na bynta ban ïai kner ka kti ka diang bad mon na bynta ki paradoh para snam kiba ju shem jingeh bad jingjynjar ha Nongbah Delhi.
