Phah pyntbit ka sorkar 10 ngut ki doktor ban pynkhlaiñ jingsumar ïa kiba kyrni dih kyiad bad drok

Shillong, Risaw 3 : Ka tnad ka koit ka khiah jongka sorkar jylla ka la phah pyntbit 10 ngut ki doktor ha ka laiñ Psychiatric bad ban sumar ïa kiba kyrni dih drok bad kyiad ha ka jaka pule doktor ha Tezpur Assam. Kane ka dei shi bynta na ka rai jongka sorkar banpynkhlaiñ ïa ki jaka sumar ( detox centres) ha baroh ki Civil Hospital kiba don ha ka jylla, kata Shillong Civil Hospital Jowai Civil Hospital , Nongstoin Civil Hospital, Tura Civil Hospital bad Baghmara Civil Hospital. Ka jingthmu ka long ban ïarap sumar ïa kito kiba la kyrni ha ki jingdih buaid naduh u drok haduh ka kyiad.
Haba kren sha ki lad pathai khubor mynta ka Sngi Palei, ka Myntri ka tnad ka koit ka khiah ka Dr Ampareen Lyngdoh ka la ïathuh ba la shim ïa kane ka rai hadien ba ka la leit jngoh bad jurip ïa ki jaka sumar kiba sumar kyrpang ïa kine kiba kyrni dih drok bad kyiad.
“ Ryngkat bad ka tnad Social Welfare bad kat kum ka projek DREAM yn sa sdang ban pynbiang lut ïa ki jingdonkam baroh ha ki jaka sumar”: ong ka myntri.
“ “Ka Tnad ka Koit ka Khiah kala phah kumba 10 ngut ki doktor dang shen ba kin leit pule pyntbit ha ka Psychiatric treatment bad De-addiction treatment sha Tezpur, Assam. Kine ki Doktor ki dei kiba dang shu pyndep ïa ka jingpule bad ki dei kiba dang shu wan phai sha Jylla Meghalaya” ong ka Myntri haba bynrap “Phi lah ban kular ïa ka Jylla bad ki nong shongshnong jong ka ïa ka pyrthei. Phi lah an ong hooid ngi lah ban don ïa baroh ki tiar sumar ïa kiba dih droks ha kylleng ka Jylla hynrei phim don pat ïa ki doktor kiba donkam ban sumar. Kumta ngi la phah ïa ki doktor ban leit pule pyntbit”.
Ha kajuh ka por, ka Myntri kala pyntip ba ka Sorkar ka la phaikhmat sha ki lad ki lynti ban pynjanai ïa ka jingtreikam jong ki detox centre ha Shillong Civil Hospital, Jowai Civil Hospital, Nongstoin Civil Hospital, Baghmara Civil Hospital bad Tura Civil Hospital.
“Mynta ngin pyrshang la kumno kumno ruh ha man ki District Headquarter ban pynkhuid shuwa ïa kiba dih droks hashuwa ba kin leit sha ki Rehabilitation. Ngi hap ban pynkhuid shuwa. Phim lah satia ban shu phah ïa kiba la kyrni sha ki Rehabilitation Centre lada kim pat pyndep ïa ka por ba pynkhuid ïa u drok ne kyiad” kala ong.
“ Kane ka dei kawei na ki subjek kaba nga sngewkhia bad shim khia bha bad kumjuh ruh u Myntri Rangbah, ngi ïeng skhem halor ka DREAM polisi wat halor ki jingshah kynthoh kiba har rukom ngin ïaid shakhmat bad hapoh kine ki snem ban wan ngin sa don ki jaka sumar kiba biang ïa kito kiba ngop ne kyrni ha kine ki jingmyllien basniew” ong ka myntri.
Ka Myntri ka la ong “ Kam long kaba suk ïa kano kano ruh ka jylla ba lashai lashai hi yn sdang noh ïa ka ‘De Addiction Rehabilitation Centre. Lada ki briew ki pyrkhat ba ka lon gkaba suk ai ba kin pyrshang ma ki hynrei ngi te ngin ïaid da ka lynti kaba biang Ngin sa don ka jingïalang bad ka Social Welfare bad ngin ïamir jingmut lang namar ngin pynthikna ïa ki paidbah ka jylla ba shen kin sa don ki jaka ai jingsumar ïa kito kiba la kyrni ha u drok bad ka kyiad hynrei shwa kata donkam shwa ban don ki nongsumar kiba la dep pyntbit bha ïalade ha ka liang ai jingsumar ïa kito kiba kyrni bad kiba la ktah ka bor jingmut jngpyrkhat ruh.