Phah pynphai ka PSM ïaki kali ba wan kit syiar na Assam, khlem ki kot ban pynshisha

Jowai, Jylliew 30: Ka Pnar Students Movement (PSM) ha ryngkat ka jingdonlang ki nongrep ba ri syiar ha kane ka sngi saitjaiñ kila ïoh bat ïa ki truck bad kali Pick-up kumba 6 tylli kiba kit bad shalan ïa ki Syiar shapoh ka West bad East Jaiñtia Hills District.
Kane ka jingpynphai ka PSM ïa kitei ki kali ka long hadien ba la ïoh jingtip ba don ki kali kiba thmu ban shalan ïa ki Syiar shapoh kine ki District. Kumta ka PSM ryngkat bad ki nongri Syiar na Jaiñtia kila mih ban bat ïa kine ki truck bad Pick-up.
Ha ka jingtohkit ka PSM ka la lap ba kine ki kali kim don satia ïa ki Challan kumjuh ruh ka Medical Report ha ka jingïadei bad ki syiar la ki dei kiba koit ne kiba don jingpang, ha kaba ka seng ka la lap ba ki syiar kiba kine ki kali ki kit ki dei ki syiar kiba danglung suda kiba don kumba 1.5 Kg lane 2.5 Kg ei ei.
Ha ka jingïadei bad kane ki nongdie syiar kila pyrshah jur ïa kane ka jingshalan ïa kum kine ki syiar kiba tang ka Vaccine lane ka dawai injek ruh kam pat kut.
Na ka liang ki nongrep ki la ong ba ka jingwan jong kine ki syiar na bar jylla ka pyntlot bor ïa ki nongri Syiar ka thaiñ ban ïaid shakhmat haka kam khaïi syiar.
Shuh shuh ka seng bad ki nongri kila thmu ban pynphai pat ïa kine ki kali kit syiar don pat ki briew kiba wan ban kam trai ïa kine ki syiar, hynrei hadien ka jingïakren la lap ba kine ki briew ki dei tang kiba shu shah kyrteng, hynrei kim dei shisha ki trai jong kine ki syiar.
Ka seng bad ki nongrep kumjuh ruh ki nongri syiar jong ka thaiñ da kawei ka jingmut kila shim ïa ka rai ban phah pynphai biang ïa kine ki kali kit syiar da kaba bud ryngkat haduh ban da poi ka shnong Saphai khappud bad ka jylla Assam.
Ha ka juh ka por ka PSM kala kyntu ïa ki supplier ban shim shwa ïa ki syiar kiba don hapoh ka thaiñ hi, khnang ban ai mynsiem ïa ki nongri syiar bad ki nongrep hapoh ka Ri-Lum Jaiñtia.