Mawkyrwat, Ïaïong, 29: U Deputy Commissioner (Supply), South West Khasi Hills District u la bthah ïa baroh ki nongtrei sorkar kynthup ruh ïa ki nonghikai skul Deficit bad Adhoc, kiba don ïa ka NFSA Ration Card (PHH ne AAY), ban aiti noh sha ka ophis Deputy Commissioner (Supply), South West Khasi Hills District ha shwa ka 15 tarik, Jymang, 2025 namarba kim dei hok katkum ki kyndon ban shah kynthup hapoh ka NFSA.
Ka jingpynmih ïa kane ka jingbthah ka long katkum ka National Food Security Acts (NFSA) 2013 bad ka Meghalaya Food Security Rules 2018 ba ki nongtrei kam Sorkar kim lah ban bat ïa ka Ration Card. Kumta, da ka jingleit pynphai jong ki kan long ka jingmyntoi na ka bynta ki longïing kiba duk, ki longïing ki bym kot bor, ki nongtrei bylla bad ki briew kiba duna dkhot met.
Kino kino ki bym kohnguh ïa kane ka jingbthah kin shah pynshitom katkum ki kyndon jong ka aiñ.
