Shillong, Risaw, 08: Ki nongïalam jong ka Meghalaya Sarva Shiksha Abhiyan Schools’ Association (MSSASA) ha ka sngi Baar ki la ki la pan jingkyrshan na ki 12 ngut ki Myntri Sorkar ba kin pynbor ïa ka Sorkar Jylla ba kan wanrah da ka polisi kaba pynskhem noh ïa ka kam jong ki 13 hajar ngut tam ki nonghikai skul SSA hapoh ka Jylla.
Kane ka kynhun ba la lamkhmat da u President u Bah Aristotle C. Rymbai mynta ka sngi ka la ïohlad ban aiti ïa ka dorkhas ha ki Myntri Sorkar ba kynthup ïa u Bah Commingone Ymbon bad ïa u Bah Shakliar Warjri bad kumjuh ruh ha u Adviser jong ka tnat Pule Puthi u Bah Himalaya Shangpliang.
“Mynta ka sngi ngi la wan ban kyrpad ïa ki (Myntri Sorkar) ba kin ai jingkyrshan ïa ka jingdawa jong ngi ki nonghikai skul SSA ha kaba ïadei bad ka jingdawa kaba la slem na ka Sorkar ban wanrah noh da ka polisi ban pynskhem ïa ka kam jong ngi ki nonghikai skul SSA. Baroh arngut ki Myntri Sorkar ki la kular ïa ngi ba kin sa ïakren ïa kane ka kam bad u Myntri Rangbah,” ong u President jong ka MSSASA u Bah Aristotle Rymbui ha ka jingïakren bad ki lad pathai khubor hadien ka jingïakynduh ïa ki Myntri Sorkar.
Dang shen ka MSSASA ka la shim rai ha ka jingïalang paidbah ban ai por tang ar bnai ïa ka Sorkar Jylla ban pynurlong ïa kane ka jingdawa.
“Ngin ap tad haduh ban da kut ka jingaipor shwa ba ngin shim ïa kiwei pat ki sienjam,” la ong u Bah Rymbai.
Haba kylli, u President ka MSSASA u la ïathuh ba ha ka 19 tarik, Nailur, ka Association ka la ïakynduh ïa u Commissioner & Secretary ka tnat Pule Puthi u Vijay Kumar Mantri ban pynsngew halor ki ar tylli ki jingdawa kata ban kyntiew ïa ka tulop jong ki nonghikai SSA bad ban kynthup noh ïa ki nonghikai SSA na ka SEMAM sha ka tnat Pule Puthi.
U la ïathuh ba ka Ministry of Education ha ka 6 tarik, Nailar, 2021, ka la hah ruh da ka shithi sha baroh ki Sorkar Jylla bad ki Union Territories ban pyntip ba ka Cabinet Committee on Economic Affairs ba la khlieh da u Myntri Rangbahduh ka ri ka la ai jingmynjur ban pynjlan ïa ka skhim Samagra Shiksha Abhiyan na ka bynta san snem, kata haduh u snem 2026.
“Dei halor kane ka shithi, bun na ki Jylla ha kane ka thaiñ Shatei Lammihngi ki la shim ïa ka rai ban shimti noh ïa ki nonghikai SSA. Kumjuh ruh hangne ha Meghalaya, ka MSSASA ka dawa ïa ka Sorkar ban wanrah noh da ka polisi ban kynthup noh ïa ki nonghikai SSA sha ka tnat Pule Puthi kham kloi katba lah,” ula ong.
Haba kyntait war ba ka don ka jingïaphiah arliang hapdeng ki nonghikai skul SSA ha Meghalaya, u Bah Rymbai u la ong, “mynshwa ngi long kawei hynrei hadien ki la mih noh bad thaw ïa kawei ka kynhun (AMSSASTA). Hynrei, ngam tharai ba ki nonghikai SSA ki ïa phiah arliang.”
