Shillong, ïaïong, 07: Ka jingphah notic lum khajna da ka Tura Municipal Board (TMB) sha ka Garo Hills Autonomous District Council (GHADC), ha kane ka dorbar mang tyngka ba dang shu kut shen, ka la pynlong ïa u MDC ka Tura u Bernard Marak ban wad ïa ki lad ki lynti ban weng noh ïa ka Municipal napoh ka sor Tura.
Une u MDC jong ka BJP u la dawa ba dei ban pynthymmai biang ïa ki Town Committee kiba ju peit ïa ka roi ka par jong kane ka sor.
“Ngi kyndit haduh katta katta ba ka Municipal ka la phah da ka sha ka GHADC ïa ka notis lum khajna (Property Tax Notice) haba ka Municipal hi dalade ka dang dei ka nongshongwai jong ka GHADC. Ka Municipal, kaba treikam hapoh ka Sixth Schedule Area, ka la phah da ka notis sha ka GHADC ban dawa ïa ka khajna, ka long kaei kaei kaba pynkyndit,” ong u Bernard haba buh jingkylli ruh ba kumno u nongshongwai (TMB) ka lah ban pan khajna na u trai jaka (GHADC).
Une u MDC jong ka BJP u la pynpaw ba kane ka jingleh jong ka Municipla ka long kum ka jingpyrshang ban knieh ïa ka itkiar jong ka GHADC ha ki jaka sor bad ong ruh ba kane ka kam dei satia ka rukom ba ka Municipal kan lum khajna na ki trai mulum kiba shong basah ha ka Sixth Schedule Area.
“Kane ka long pyrshah ïa ka Article 243, ka bym ailad ïa ka Municipal ban treikam hapoh u pud u sam jong ka Sixth Schedule Area. Kim don hok ban dawa khajna na ka GHADC. Nga sngew ba ka ladei ka por ban weng noh ïa ka Municipal bad ban pynim biang ïa ki Town Committee,” u la bynrap.
U Bernard u la ong ba un sa mudui sha ka Ingbishar Meghalaya High Court ban pynjlan ïa ka jingthaw ïa ki Town Committee hapoh ka KHADC ha nongbah Shillong, bad ha ki jaka Municipal jong ka Garo Hills ruh kumjuh.
“Ka High Court ka la pynmih ïa ka hukum ban thaw ïa ki Town Committees ha Shillong bad ngi kwah ba ïa kane ka hukum yn pyntreikam ruh sha Tura. Ki paidbah ki la ïakynduh jingeh ban siew khajna ar tylli, kata sha ka TMB bad sha ka GHADC. Haba ngi don ïa ka Patta khyndew ba la ai da ka GHADC balei pat ngi dang hap ban siew ïa ka khajna sha ka TMB? Nalor kata ïa ki Trade License la ai da ka Council ym da ka TMB,” ong shuh shuh une u MDC jong ka BJP.
