Shillong, Naitung 20: Ka Ïingkashari Supreme Court ka la ai da ka notis sha ka Sorkar Pdeng hadien la ïohpdiang da ka Writ Petition na ka Sorkar Nagaland.
Kane ka jingujor kadei halor ka jingkyntait jong ka sorkar pdeng ban pynshitom ïa ki 30 ngut ki shipai India kiba donkti ha ka jingjia ha ka 4 tarik u Nohprah, 2021.
Ha katei ka sngi, la kynnoh ba ka kynhun jong ki shipai ka la siat ïa kawei ka kali Pick-up kaba kit ïa ki nongtih maw ha ka shnong Oting, shatei lammihngi jong ka Nagaland, da kaba shim bakla ba ki dei ki lehnoh bad pynïap ïa 6 ngut ki riew paidbah. Ki jingkulmar kiba la jia hadien kata kila pynlong ïa ki 8 ngut ki riew paidbah ban ïap haba la kynnoh ba ki bor pahara kila siat ïa ki.
Kum ka jingkynthoh, ka ïingdorbar jong ka Nagaland, ha ka dorbar ba kyrpang, da kawei ka sur, ka la rai ban dawa ban weng noh ïa ka AFSPA na Nagaland. Ka jylla ka la pyrshah ïa ka rai jong ka sorkar pdeng ha ka 28 tarik u Rymphang ban kyntait ïa ki jingpynshitom katkum ka aiñ jong ka Armed Forces Special Powers Act (AFSPA), 1958.
Ka ïingbishar kaba don lai ngut ki nongbishar ba la ïalam da u Chief Justice ka India u DY Chandrachud ka la ai por hynriew taïew ïa ka Sorkar Pdeng ban phah ïa ka jubab jong ka.
Ka sorkar Nagaland ka pynpaw ha ka dorkhas jongka, ba ka jingtohkit jong ki pulit ka Nagaland ka la lum ïa ki sakhi sabut, kaba la ïalam sha ka jingpynmih ïa ka Chargesheet.
Ha u Naitung 2022, ka Ïingkashari Supreme Court ka la pynsangeh noh ïa ka jingshah pynngat ha ki kam runar pyrshah ïa ki heh sorkar ba la shah kynnoh, da kaba kdew ba ym shym la ïoh ïa ka jingbit katkum ka AFSPA.
Ki jingpynshitom ki long kiba donkam katkum ka AFSPA, hynrei ka sorkar pdeng haduh mynta ka la kyntait ban ai jingbit.
