Shillong, ïaïong, 21: U Myntri Rangbah ka Jylla u Conrad Kongkal Sangma ha u kyrwoh lyngba ka Twitter u la pynpaw ka jingsngewsih halor ka jingkhladnoh jong u Bah J.D. Rymbai uba long u Myntri Rangbah barim ka Jylla.
“U Bah Rymbai u la long u nongthaw aiñ uba pawbha bad uba la ïoh jingieid na baroh ki briew kiba u la ai ka jingshakri. U synñiang u bynhei ba u la noh sha u sup u thiar jong ka jylla jong ngi yn sa ïai kynmaw junom. Ai ba ka mynsiem jong u kan jahthait ha ka jingsuk,” ong u Conrad Sangma.
U Nongïalam ka Liang Pyrshah u Dr. Mukul Sangma ha u kyrwoh lyngba ka Twitter u la pynpaw ka jingsngewsih halor ka jingkhladnoh jong u Bah JD Rymbai bad ha kajuh ka por u la phah ruh ïa u kyrwoh sngewlem sha ki bahaing hasem bad sha baroh kito kiba don ka jingïadei kaba jan bad u Bah Rymbai kiba la mad ïa kane ka jingjia kaba sngewsih.
“Ka jingsngewrit bad jinglong kaba shisur ka don ha u Bah Rymbai. Ka long kaei kaei kaba sngewkmen ban ïoh ïatreilang ryngkat bad u ha ki snem ba ladep bad kin shu sah sa tang ha ki jingkynmaw,” ong u Dr. Mukul.
Ki Ophisar bad ki nongtrei jong ka Meghalaya Legislative Assembly Secretariat ki la pynpaw ka jingsngewsih halor ka jingkhladnoh jong u Bah JD Rymbai mynta ka step sngi Palei.
“Ïa u Bah JD Rymbai yn sa kynmaw ïa ki jingshakri jong u kum u Deputy Speaker, kum u Speaker bad kum u Myntri Rangbah jong ka Jylla Meghalaya,” ong u kyrwoh ba la phah da u Commissioner & Secretary ka Assembly u Dr. Andrew Simons.
“Yn sa kynmaw pateng pakit ïa ka jinglong bashisur jong u, ïa ka jingaiti lut jong u na ka bynta ki paidbah bad uba jar jar. Da ka jingkhladnoh jong u, ka Jylla kan duhnoh ïa u nongïalam uba khraw bad uba aiti lut,” ong u kyrwoh.
“Ha kum kane ka khyllipmat ka Assembly Secretariat ka phah ïa u kyrwoh sngewlem sha ki bahaing hasem bad duwai ruh ba u Blei un pyntngen ïa ki ha kum kane ka jingjia basngewsih,” bynrap u kyrwoh.
