Shillong, Naitung 11: Ka Assistant Commissioner jong ka Food Safety and Authority of India ka Kong BS Mukhim ha ka sngi Nyngkong ka jingleit jurip ïa ka jingkhuid jingsuba jong ki dukan bad ki basa die doh ha ïewduh bad Motphran. Hadien ba ka la lap ïa ka jinglong jingman ka khuid ka suba ka Assistant Commissioner ka la hukum ïa ki nongdie doh baroh ba kin khang shuwa ïa ka dukan jong ki naduh ka 13 haduh ka 15 Naitung bad ban pynbha ïa ki dukan ki basa bad ki jaka buh doh.
Ha kane ka jingjurip ka Kong BS Mukhim ka la ong ba kane ka jingkhang dukan ka long ban ailad ïa ki dukan ba kin pynbha ïa ki dukan namar ka jingbym shngaiñ ka rukom long ka rukom buh ïa ka doh kumba long mynta.
Shuh shuh na ka liang jong ka ka la bthah ba ki dukan die doh ki dei ban airong ruh ïa u dieng shaiñdoh jong ki da ka rong lieh ïa u dieng shaiñdoh synïang, rong soh ba sting ïa u dieng shaiñdoh Masi bad rong suiñbneng pat ïa u dieng shaiñdoh jong ka doh syiar.
Ka Kong BS Mukhim ka ong ruh ba ki nongshong die doh ki dei ban ym wah shuh ïa ki doh ha ki prek hynrei ki buh ha ka jaka kaba shngaiñ kaba ki skaiñ kin ym ïoh ban boi. Shuh shuh ka la hukum ba ïa ka doh yn ym lah ban shu thad lyngkrang beit baroh khoit ha ki jaka ba ïohi hynrei ban buh tang katto katne bad ban buh pat ha ki jaka kiba ym ïohi ïa kaba tam. Na ka liang jong ka ka la ai jingbthah ruh ba ki dei ban kah da ki ïit bad ban tap ruh da ki musari khnang ba ki skaiñ kin ym ïoh boi ïa ka doh. Ka Kong BS Mukhim ka la pyntip ruh ba na ka liang ka tnad kan sa pynlong ïa ka jinghikai kaba kyrpang ïa ki nongdie doh khnang ban hikai ïa ka rukom die bad buh doh kan long kaba shngaiñ na bynta kiba bam.
Kumban shu kdew hangne kane ka jingleit jurip bad jingshimkhia ka ka FSSAI bad kiwei ki tnad sorkar halor kane ka jingkhuid jingsuba ki dukan bad ka doh ba die ha ïew, ka dei hadien ba ka ïing bishar Meghalaya High Court dang shen ka la pynmih ïa ka hukum ba ym bit shuh ban wah bad pyni paidbah ïa ka doh ha ïew ha hat.
