Phah ka India ïa u briew ba nyngkong eh sha haw haw, ïathuh u Dr.Jitendra Singh
![](https://mawphor.com/wp-content/themes/mawphor/images/default-thumb/publisher-lg.png)
New Delhi, Naitung, 05: Yn ïohi ka pyrthei ïa u briew ba nyngkong jong ka India ba poi sha ka haw haw bad kiwei ki briew jong ka India ha ki jaka ba jylliew jong ka duriaw shuwa u snem 2025, la ong u Myntri Sorkar Pdeng Dr.Jitendra Singh ha ka Bharat 24 News network ha ka jingai jingkren jong u mynta ka sngi.
Ha ka jingbatai shaphang ka jingïaid shaphrang ka India ha ki kam jong ka kiba ïadei bad ka haw haw bad ka duriaw, u Dr. Jitendra Singh u la ong ba saw ngut ki astronaut – lai ngut ki Group Captain bad uwei u Wing Comman-der ki la shah jied na ka bynta ka Human Space Mission kaba nyngkong jong ka India – Gaganyaan. Kumjuh, u la ong ba ka Deep-Sea mission jong ka India kan phah lai ngut ki briew jong ka risha ki jaka ba jylliew jong ka duriaw ha u snem 2025.
Myntri Sorkar Pdeng Dr.Jitendra Singh ha ka prokram ba la pynlong da ka Bharat 24 News network
Ha ka jingkren shaphang ka roi ka par ha ka thain shatei lammihngi, u Myntri Khynnah (Independent Charge) jong ka tnad Science and Technology, Myntri Khynnah (Independent Charge) jong ka tnad Earth Sciences, Myntri Khynnah ka PMO, tnad Atomic Energy bad tnad Space bad Myntri Khynnah ka tnad Personnel, Public Grievances and Pensions Dr. Jitendra Singh u la ong ba ka jingpynkhlain ïa ki jingdon jingem ha ka thain shatei lammihngi jong ka India ha kine ki 10 snem ba la dep ka dei ka nuksa jong ka roi ka par jong u Myntri Rangbah Duh Modi. U la kren ruh shaphang ki kad liengsuin ba thymmai ba la pyntreikam ha ka thain shatei lammihngi. U la ong ba ka la don ka jingkiew ka rynsan ki surok ba lah ban pyndonkam ha kano kano ka por bad ki surok bah ha ryngkat bad ka jingpynïasoh sha ki jaka nongkyndong. Ka tnad rel ka la sdang ban pynïaid ïa ki rel na Itanagar bad ki lad ka leit ka wan lyngba ki jaka shong um ki la plié. U la ong ba ka la don ka roi ka par ha ki jingdon jingem bad ruh ha kaba ïadei bad ki briew kiba la tbit ha ki kam ha kaba ki nongai kam na ki kam jaka sahkai ki briew bad ki kam pynher liengsuin ki la sdang leit sha kine ki jylla ban ai kam ïa ki briew. U la ong ruh ba u Myntri Rangbah Duh u sngewjan bha ïa kane ka thain bad ba u kwah ban seng ïa ka ‘Citrus Fruit Park- A Centre of excellence’ ha Mizoram namar ki jinglong jingman ha kane ka jylla ka ïahap bha ïa kane ka kam.
Haba la kylli ïa u shaphang ka Jammu Kashmir, u Dr. Jitendra Singh u la ong, “La bun tam ka jingwan ki nongjngohkai sha Kashmir kaba kot haduh 2.5 klur ha kane ka samoi ba la dep ka dei ka dak jong ka roi ka par bad ka shongsuk shongsain” U la ong ba 1 lak ngut ki briew ki la poi na ka bynta ka Amarnath Yatra kaba pyni ruh ïa ka jingkiew ka jingwan ki nongjngohkai na kiwei kiwei ki bynta jong ka ri. U la ong ba ki kam pyntriem ki la jan duh jait.
Kane ka kynhun pathai khubor ka la ïaroh ïa u Dr.Jitendra Singh uba la jop elekshon laisien kynthih mynta na ka konstituensi Udhampur bad ruh ka jingshah jied jong u ban long Myntri mynta la laisien. U Myntri ka tnad Science and Technology Minister u la kren shaphang ki jingjam shaphrang ha kine ki por ba la dep bad u la kren shaphang ka jingïaid lynti sha ka thong jong ka India. U la ong, “Ka kam haw haw kam dei tang ka jingpynher ïa ki rocket bad ki satellite hynrei kan kyntiew ruh ïa ka roi ka par bad wanrah ïa ka jingbha ha ka kam rep, ki jingdon jingem, ki lad jingïakren, ka jingai jingsumar bad kiwei kiwei. Ki kam kum ka jingbuh rekod ïa ki jaka puta, ka geospatial polisi ba thymmai, ka polisi haw haw ba thymmai, bad ki sienjamkum ka soil health card, DBT, land mapping bad kiwei kiwei kin kyntiew ïa ka jingseisoh na ki kam rep.” “Ha u snem 2022 ngi don tang kawei ka startup ha ki kam haw haw bad ha u snem 2024 hadien ka jingplie lad ha ki kam haw haw ïa ki briew bad ki kynhun shimet, ngi don jan 200 tylli ki startup bad bun na kine ki don ka bortreikam ha kylleng ka pyrthei. U la ongruh ba ha kine ki katto katne bnai, ka jingbei tyngka kaba 1000 klur ka la wan ha ki kam haw haw na ki nongbei tyngka shimet.