Phah jurip u BDO Bhoirymbong haki Engineer ïa ka Resort ba kynnoh tei beaiñ harud wah Uminshi

Nongpoh, Naitung, 26: Hadien 1 sngi ba ka HYC bad HITO kala leit ban ujor sha u BDO Bhoirymbong C&RD Block halor ka jingkynnoh tei beaiñ ïa kawei ka resort harud ka wah Uminshi haka thaiñ Bhoirymbong, naka liang u BDO Bhoirymbong mynta ka sngi u la phah da ki engineer ban leit jurip ïa katei ka resort kumba la kynnoh.
Ha katei ka jing jingjurip ïa katei ka jaka la sakhi ruh da ka jingdon lang u President ka HYC Bhoirymbong u Samla Tyngshaiñ Makri, u Samla Samuel Hinge President ka HITO Bhoirymbong Circle, u Bah Hamjngai Hinge Rangbah Shnong Lumsohpieng Bhoirymbong, ki nongïalam shnong ka Lumdaitkhla bad u trai katei ka resort u Bah Denningstone Marbaniang.
Haba kren sha ki lad pathai khubor naka liang ki nongïalam jong ka HYC bad HITO kila ai ka jingkhublei ïaka ophis u BDO kaba la shimkhia hadien ka jingujor jong ka seng bad phah ruh ïaki engineer mynta ka sngi ban leit thew leit woh ïa katei ka jaka bad naka liang kitei ki kynhun seng kila kyrpad ruh ïa u BDO ba un bishar hok ïaka kaiphod ba yn sa rah da kitei ki enginner bad kam dei ban noh shilliang.
Na ka liang u Bah Hamjngai Hinge Rangbah Shnong ka Lumsohpieng u la ong ba naka liang ka shnong kala dep ban buh dak lypa ba ka jingtei ka dei ban jngai kumba 5 phut naka wah kaba don ha katei ka jaka hynrei u trai katei ka jaka um shym la burom bad bud ïaki jingbthah ka Dorbar Shnong.
Katba na ka liang u trai katei ka resort u Bah Denningstone Marbaniang u la ong ba u kloi ban bud ryntih ïaki kyndon aiñ bad mynta ka shong haka rai naka ophis u BDO bad kyrpad ruh ba katei ka jingjurip bad ka jingpyntreikam ïaki kyndon kam dei ban noh shilliang hynrei ka dei ban treikam lang salonsar ïa kiwei ruh ki trai jaka kiba don jaka harud ka wah Uminshi.