Phah jurip ka Sorkar ïa ka jingshah pynjot dusmon ka Residential School ha Byndihati
![](https://mawphor.com/wp-content/uploads/2023/10/Residential-School-Byndihati-2.jpg)
Khliehriat, Risaw, 22: Ka Jaiñtia National Council (JNC) ka la ai khublei ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) kaba la kloi ban shim khia ban phah tohkit halor ka jingshah pynjot dusmon jng ka Residential School kaba don ha ka shnong Byndihati-Umtrya kaba la shu ieh iing jah da ki snem.
Ïa ka jingtohkit la leh da ka Estimate Committee jong ka Sorkar Jylla ha kaba ki la leit jurip ïa ka iing skul bad ban ai ïa ka kaiphod sha ka Sorkar.
Ha u kyrwoh ba la phah da u Publicity ka seng u samla Mebanteilang Sukhlaiñ, ka seng ka la kitbok kitrwiang ïa ka Sorkar ba kaei kaba ka kan leh bad pyndep kan long na ka bynta ka bha ka miat hi jong ki paidbah bad ruh ka ban ai ruh ka jingmyntoi ym tang ïa kane ka thaiñ hynrei ïa baroh kawei ka jylla.
Kum ban shu phaidien halor kane ka mat, ka seng ha ka 6 tarik u bnai baladep, ka la ïakynduh markhmat ïa u Symbud Myntri Rangbah ka jylla u Bah Sñiawbhalang Dhar bad aiti ruh da ka dorkhas ban buddien ïa kane ka jaka pule kaba la shu iehnoh ïingjah la bun bun snem mynta.
Na ka liang jong u Symbud Myntri Rangbah u la kular hakhmat ka seng ban shimkhia halor kane bad ban phah ruh ïa ki bor ba dei ban peit ïa kane ka kam bad ong ruh ba un sa pynlong ruh da ka jingïalang bad ki heh ophisar jong ka East Jaiñtia Hills District khnang ban ïoh leh ïa kaba donkam.
Shwa ban ujor sha u Symbud Myntri Rangbah ka Jylla, ka seng ka la hiar jurip ïa ka Residential School ha ka shnong Byndihati hadien ba la ïoh ujor na ki paidbah ba ka Residential School kaba la shu iehnoh ïingjah ka la shah pynjulor.
Da ki dur bad ki video ba ka seng ka la ring ka la phah sha ki ka Sorkar kum ka jingpynkynmaw ïa ba katno tam ka jingjulor bad ka jingshah rong tuh ki tiar ki tar na kane ka jaka pule kaba ym shym la pyntreikam mynta la bun bun snem bad kaba wanrah ruh ïa ka jingduhnong kaba khraw ïa ka thaiñ.
Hadien kane, ka Seng ka la ïakren bad ka MLA jong ka Sutnga-Saipung Constituency ka Kong Santa Mary Shylla kaba la ïadon ryngkat lang ruh ha ka Estimate Committee kaba la sakhi ïa kane ka Residential School.
Ka Kong Shylla ka la pyntip ha ka seng ba ka dawbah kaba pynslem ban plie ïa kane ka shlem pule ka long namarba dang don ki jingduna ha kaba ïadei bad ka jaka bad ki jingtei ki dang donkam shuh ban shna khnang ba kan dup ïahap katkum ki jingdonkam bad jingdawa jong ka Residential School.
Ka la kyrpad ruh ïa ka seng ban long kiba ïaishah sa katno katne por bad ban ailad ruh ïa ka Sorkar ba kan wad ïa ki lad ki lynti khnang ba ka jaka pule kan ym long kaba sepei.