Shillong, Nohprah 07: U MP ka Lok Sabha jong ka Shillong Parliamentary Seat u Dr A J Syngkon u la phah ïa ka shithi sha u Myntri ka Tnat Ayush jong ka sorkar pdeng ha kaba ïadei bad ki jingeh kiba la mih hapoh kane ka tnat ne ka National AYUSH Mission (NAM) ha Meghalaya.
Ha ka shithi ba la phah u la ong ba ki Medical Officer kiba la thung hapoh ka AYUSH ka jaka sumar kaba don kumba 10 jingthiah ha ka jylla la siew T. 32,000 ha ka shi bnai bad kane ka jingsiew ka dang long kaba duna bha na ka bynta ki AYUSH Medical Officers ba la thung hapoh ka National Health Mission (NHM), kiba ïoh ruh ïa ka pisa basic pay kaba long T. 45,500 ha ryngkat bad ka annual increment kaba long 5%.
U la ong ba kane ka jingsiew ka dang long kaba duna bha haba ïa nujor bad ka jingtreikam jong ki Medical Officer kiba la ai ka jingshakri ïa ka kam khlem shong thait. Shuh shuh ki officer kiba la shah thung hapoh ka jaka sumar jong ka AYUSH kaba don 10 jingthiah ki donkam ban pyndep ïa ka kamram kaba long 24×7, khamtam eh hadien ba la pyntreikam ïa ka Inpatient Department (IPD).
U la ong ruh ba kane ka la pynkheiñ ïa ka hok ki doktor kaba la buh hapoh ka Article 14 jong ka riti synshar jong ka ri India (Doctrine of Equality).
Ha kaba ïadei pat bad ki contractual worker na ka liang jong u MP u la ong ba ki AYUSH Medical Officers bad ki nongtrei jong kane ka jaka sumar kaba don 10 jingthiah kim ïoh ïa ki jingsiew kumba ki dei ban ïoh bad kane ka la ktah bha ïa ka jingtrei ka jong ki.
Ha kaba khatduh u MP u la ong ba kane ka jaka sumar AYUSH kaba don kumba 10 jingthiah ka dang don bun ki jingduna kiba dei ban shim khia da ka sorkar kaba donkam ruh ïa ka jingdonkam ban kyntiew kyrdan.
