Phah jingthoh ka DS Tympang sha ka CS ka jylla ban leit theh ïa ki ñiut ha Mynkjai

Jowai, Jymmang 03: Ka Dorbar Shnong Tympang Iawmusiang Jowai kala phah syndon da ka jingthoh sha ka Chief Secretary jong ka Sorkar jylla ban pynkhuid noh ïa ki ñuit kiba dang sah ha kylleng ka sor Jowai da kada leit theh noh ha Mynkjai ka jaka jong ka District Council kaba ba la ju pynlong kum ka jaka theh ñiut da ki 40 snem.
Katkum katei ka shithi ba la phah la pynsngew ba ka shnong Tympang-Iawmusiang kala mad shibun ki jingeh na ka daw ka jingtlod ka rukom treikam jong ka Jowai Municipal Board (JMB) ban leit lum ïa ki ñiut na kylleng ki dong bapher bapher jong ka sor Jowai bad kumjuh ha ki jaka ïew.
La kdew ruh ba kawei na ki jaka lumthup ïa ki ñiut ha Iawthymme Ladthadlaboh kala jur bha haduh kine ki sngi kaba la jan dap 4 bnai mynta, la ïathuh wat na ka liang ka tnad Urban Affairs kaba la ai jingtip sha ka ïing kashari ba don burom High Court haka jingshong bishar ha ka 22 tarik u Ïaïong, 2022 da kaba kam ba kan pynkhuid lut ïa ki ñiut hynrei kine ki ñiut ki dang neh sah haduh mynta.
Na ka liang ka DS Tympang-Iawmusiang kala kyntu jur na ka Chief Secretary ba kan shim khia ïa kane kam mardor namar ka jinglehsting jong ki bor pynïaid District, ka tnad Municipal bad ki Urban Affairs kaba la buh jingeh ïa ki paidbah khamtam ha ka liang ka koit ka khiah bad ïa ki sawdong sawkun ka Mariang.Katkum katei ka shithi la kyntu jur na ka Chief Secretary ba kan btah mardor ïa ki bor District kumjuh ïa ka tnad Municipal ba kin leit theh noh ïa ki ñiut ha Mynkjai ha ka rukom kaba dei khlem da ktah ïa ka koit ka khiah jong ki briew.