Peitngor bha ba ki Social Media laitlan bad AI kin ym knieh ïa ka hok ki lad pathai khubor ba shisha : Dr. Ampareen

Shillong, Nailur 07 : Ka Myntri ka tnad Information and Public Relations (IPR) ka sorkar jylla, ka Dr. M Ampareen Lyngdoh ka la banjur ba donkam ban peitngor bha khnang ba ki social media laitlan kumjuh ki bor jong ka artificial intelligency (AI) kin ym knieh noh ïa ka hok jong ki lad pathai khubor tynrai kiba ju pynsaphriang ïa ki khubor ba shisha.
Ïa kane ka Myntri ka la pynpaw haba kren kum ka Kongsan hadien ka General Meeting jong ka Meghalaya Editors’ and Publishers’ Association (MEPA) kaba long ha kane ka sngi Saitjain. “Ka jingma kaba ap ïa ki lad pathai khubor ba shisha lada ym lah ban tehlakam bad peitngor bha ka dei na ka jingjur ki social media laitlan, nangta ki bor ka artificial intelligence,” ka la ong haba kren kum ka Kongsan ha kane ka jingïalang.
Na ka liang ka Myntri ka la ong ruh ba ha kane ka juk kaba pynsuk lut da ki bor ka AI hynrei ka long pat kaba donkam ban da bishar bad pynshisha shwa ïa ki jingtip.
“Mynta wat ki paidbah ba peit khubor kim tip shuh kano kaba shisha bad kano ka bym dei. Kumta kadei ka kamram jongka MEPA ba kan shimkhia bha ïa kane ka ishu,” la bynrap biang ka Myntri.
Haba kren pat halor ka ishu kaba ïadei bad ki lad pathai khubor, ka Myntri ka la ïathuh ba naduh u snem 2023 ki la shimkhia ïa kane ka bynta bad ka MEPA ryngkat ka jingdonlang u Myntri Rangbah ka Jylla Conrad K Sangma. Ka la ïathuh ruh ba bun na kine ki ishu la dep ban pynbeit watla ki don sa katto katne ki mat kiba dang sahteng.
“Na ka liang u Myntri Rangbah u la dep bthah ba watla um lah ban don lang hangne hynrei na ka por sha ka por u ju buddien lang ïa kane ka mat kaba ïadei bad ki lad pathai khubor,” ka la bynrap biang.
Ha kajuh ka por ka Myntri ka la ïathuh ruh ba ka sorkar jylla kan pyntikna ban pynbeit ïa ki mat kiba dang sahteng la ka long naduh ka jingsiew ïa ki bai advertisement bad kiwei kiwei ki jingmyntoi na ka bynta ki Publisher, ki Editor bad ki journalist ha ka jylla.
Ka Myntri ka ïai ban ruh ïa ka jingdonkam jong ki lad pathai khubor ban pynkhlain khnang ba kin lah ban ïakhun ïa ki khubor laitlan kiba mih kum ki youtuber ne influencer khnang ba ki jingtip kiba poi sha ki paidbah kin dei kiba shisha ym kiba noh shilliang.
Shuh shuh ka ong ruh mynta da ka jingtuklar lang jong ka sorkar pdeng baroh ki nongtrei ki dei ban ïoh ïa ki skim bapher bapher kum ka skim ynda la shongthait, ki lad ai jingkyrshan ha ka pang ka shitom ha ki jylla jong ka ri baroh kawei.
Ha kane ka jingïalang la ïoh ruh ïa ka jingkren na u Commissioner & Secretary ka DIPR, u Vijay Kumar Mantri uba la banjur lang ïa ka jingdonkam ban pynshisha shwa ïa ki khubor ha shwa ban pyllait sha ki paidbah namar shisien ba la lait bad saphriang ka la long kaba eh pat ban pynbeit.
Katba na ka liang u Director ka tnad, Bah Batlang Sohliya u la pyntip ba ka jingïakren na ka bynta ki jingmyntoi ïa ki lad pathai khubor ka la ïaid shakhmat. Shuh shuh u pyntip ruh ba wat ka jingkyrshan ha ka lïang ka advertisement kan ïai bteng na ka bynta ki lad pathai khubor la ka long ha ka print bad ki digital.
Shwa kane, na ka liang ka MEPA ka la pynsngew shibun bha ki mat kiba ïadei na ka bynta ka jingdonkam jong ka sorkar ban kyrshan lang khamtam haba ïadei bad ka bit ka biang jong ki nongtrei ki bym hap lang ha ka thup ki nongthoh khubor, nangta ha ka liang ki advertisement bad kiwei kiwei ki jingïarap bad ki skim kiba ïadei na ka bynta ki lad pathai khubor nalor kiwei kiwei.