Peitkai ki paidbah katba dang tan ki mashin ïa ki nar ha jingkieng thymmai ha Umshyrpi

Shillong, Jylliew, 14: Ki paidbah na ki jaka ba marjan bad ka Jingkieng Umshyrpi ki la ïa mih ban wan peit khnang katba ki nongtrei jong ka kompeni ba pyntrei ïa kane ka jingkieng thymmai ki dang pynkynriah ïa ki nar kiba heh da kaba pyndonkam da ki mashin kiba heh ba heh kiba la buh na shilliang sha shilliang.
Na ka liang ki bor sorkar, khnang ban ym ktah bad pynthut ïa ka leit ka wan jong ki paidbah kiba donkam ban ïaid lyngba ka jingkieng Umshyrpi, kumta ka jingshna ïa ka Jingkieng ba thymmai kaba dei shi bynta bad ka surok thymmai, la buh ban shna noh tang ha ka por mynmiet.
Ban stet ka kam, na ka liang ka kompeni ka la sdang ban pynkynriah ïa ki nar heh naduh ka miet sngi Palei, hadien ba la ai lad ïa ki ban trei naduh ka por 10 baje mynmiet haduh ka por 5 baje mynstep man ka sngi kata naduh ka 12tarik haduh ka 15 tarik mynta u bnai
Kumta ban ym thut ka por trei kaba long naduh ka por 10baje mynmiet haduh 5 baje mynstep na ka liang ki bor pulit ka distrik ki la kyntu ïa ki paidbah nongleit nongwan ba ki hap ban ïaid lynti noh na kiwei ki surok ha kitei ki por ba la kdew haneng katba ka jingpyntrei ka dang ïaid.
Tad haduh ka miet sngi Saitjaiñ ka jingtrei ka dang ïaid shaid shaid bad la khmih lynti ba la kumno kumno ha ki khyndiat sngi yn lah ban pyndep noh ïa ka jingpyndait ïa kine ki nar heh ha katei ka jingkieng.
Na ka liang u Superintendent of Police ka East Khasi Hills Bah Vivek Syiem ha u kyrwoh u la pyntip ruh ba ki kali kiba wan na ka thaiñ Upper Shillong ban ïaid lyngba ka jingkieng Umshyrpi bad MES Point kin hap ban ïaid noh na 5 Mer, Upper Shillong sha Pomlakrai – Laitkor – Madanrting – Laitumkhrah bad shadien ter ter.
Na ka bynta ki kali kiba wan na ka surok Lumdiengjri ban leit sha Upper Shillong lyngba ka jingkieng Umshyrpi kin hap ban ïaid noh na Laitumkhrah – Madanrting – Laitkor – Pomlakrai – 5MerUpper Shillong bad shadien ter ter.
La pyntip pat ba Ïa ki kali kit nongpang, yn shah ban ïaid ha kine ki kynta ba la khang ïa ka jingïaid kali lyngba ka jingkieng.