Shillong, Naitung 28 : U Myntri ka tnad ka Koit ka Khiah ka Jylla, James K Sangma u la kyntu ïa ki nongtrei ka EMRI 108 ba kin sangeh noh ka jingïakhih khamtam ha kum kane ka por ba ka jingdon kiba ïabit thymmai ïa u khniang jingpang COVID ki la nang kiew.
“Ha kum kane ka por ba ngi ïohi ba u khniang jingpang COVID u sdang kiew, nangta u Monkeypox u la sdang ban rung ha India, kine kiei kiei kiba ngi sngewkhia watla um pat rung ha Meghalaya ruh. Hynrei ngi hap ban long kiba husiar pat bad kumta, kum kine ki jingïakhih ki dei ki jingjia kiba ngim sngewtynnad,” la bynrap shuh shuh u Myntri haba kren bad ki lad pathai khubor.
Nalorkata, u Myntri u la ong ruh ba dang hynin ka sngi u la dep ban kynduh ïa kitei ki nongtrei 108 bad u la dep ruh ban pynpaw ha ki ïa ka nongrim ba ka sorkar ka ïeng.“Ngi la dep kynduh ïa ki bad ngi la dep ong ruh ba ka kam jong ki kadei ka ïap ka im jong ki briew kiba donkam kyrkieh ïa ka jingïarap jong ki ambulance. Kumta ngi la ong ïa ki ba kin sangeh noh bad sdang biang ban trei.”
U Myntri u la ong ruh ba halor ka jingdawa jong ki ba ka sorkar kan pynïaid hi noh ïa ka EMRI 108, na ka liang ka sorkar jylla ka la kren shai ba kim lah satia namar ym don satia kawei ruh ka jylla ha India kaba pynïaid hi dalade ïa ki EMRI hynrei baroh la aiti pynïaid beit ha ki kompeni.
U ong ruh ba dei hadien ba ki lap ïa ka jingdkoh ka rukom treikam jong katei ka kompeni kaba pyntrei baroh shi katta ba ki la rai ban ym pynthymmai shuh ïa ka kontrak bad ki. “Dei na kane ka daw ba ngi la khot tender da kaba thymmai na ka bynta ban pynïaid,” u la bynrap biang.
Lah ban kdew hangne, ba ka kynhun ki nongtrei 108 ki la rai ban bteng beit ïa ka jingïakhih hadien ba ka sorkar jylla lyngba u Myntri ka tnad ki la pynpaw ba kin ym lah satia ban pynïaid hi ïa ka EMRI 108.
