Ki ktien jong ki longshwa manshwa ki dei kiba da shongkhia bad kiba da kit jingmut haduh katta katta khamtam eh ha ka sneng ka kyntu ïa ki longdien khamtam eh na ka bynta ki khun ki ksiew ha kane ka juk mynta kiba la duh lut ïa ka burom ka akor ha ki liang baroh khamtam eh haba ïadei bad ka jingburom ïa kiba la leh la san ne kiba la noh ka rta khlem da klet pat ïa ki kmie ki kpa bad ki bahaiing ha sem la jong.
Kane ka bynta jong ka jingïakren, ka la donkam ban nang ïatih shuh shuh khamtam lei lei ha kine ki sngi, ha kaba ka social media ka la jubor haduh katta katta bad ba ki briew kiba bang ban ïa wohnia wohdaw ïa kiwei pat, ban ïa kren beiñ bad ñiew beiñ ïa kiwei khlem da kynmaw pat ban peit ïa ka lyngkdong lajong. Haba kren ïa kane mat, ka donkam ruh ïa ka jinglong adkar ïalade, khamtam lada phi long ki nongïalam ha ka saiñ pyrthei, ha ka kam niam, ka kam sengbhalang bad kiwei kiwei bad kata ka mut, ba phim dei ban im lyngkar, kren lyngkar, namar ba katei ka kyrtoh hi ïalade bad ba kam slem hi ruh, ba kan wan phai kylla.
Ka jingshisha, kaba paw bha ha kine ki sngi ka long ïa uno uno u briew ynda u la ïap ani ba ki tuid ki jingkren sngewlem, ki bym don pyrthei shuh lada dei ha ka ktien, lada dei ha ka thoh, lada dei ha ki kotkhubor lane ha ki jingïalang sngewlem ban burom khatduh ïa uba ïap. Haba kren ïa kane kam mut ruh ban ong, ba ngim dei ban kynthoh ïa ki kam ki duk jong uno uno u briew, khamtam lada u dei u Nongïalam paidbah, hynrei katei ka dei ban long beit halor ki kam ki jong u, khlem da shim kabu ban kren ïa ka jinglong shimet jong u briew, ïa ka jinglong ka rta, ka dur jong u, ka kyrteng jong u, namar ba kine ki pynjah burom ïa utei uba shah kren, ïa ka ïing ka sem jong u bad kaba kum katei, kam ju dei ruh ka akor Khasi, ban ïa tih tyllong ïa ka jinglong jingman jong u shimet, namar ba kan kyrtoh kylla ïalade.
Kiba bun na kiba ktah ïa ki social media, ha kine ki sngi, ki dei ki khun samla bad kumta, ka la dei ïa ki, ba kim bit ban tih tyllong eh, ïa ka jinglong shimet jong u briew, namar ba katei kan pynmlien ïa ki, ba kin tuklar ïa ka jingim kiwei ban klet pat ïalade bad da katei kajuh ka jingmlien, kan sa pynpoi ïa ki, sha ka jing ïashun ne ïashrut para briew, tang namar ka jingmlien ban im bad ban kren lorni ïa kiwei. Ka la dei ïa kane ka juk, ba kan pyrkhat jylliew ïa kane ka mat bad kata ka long, ba ka dei ban ñiew burom akor ïa la ki para ri, ha kaba kan ai burom ïa uba dei hok bad kan sneng kan kraw ïa uba leh tam leh palat hangne hangtai bad haba shu peit kane ka jinglong ka la duh ha kine ki sngi ha ka Jaidbynriew Khasi.
Naduh nangne shakhmat, ka la dei namar kata ïa kito kiba kam ïalade, kum ki nongïalam, ba kin da husiar ïa la ka kren ka khana, khamtam, haba ki kren ha ki rynsan paidbah bad ba kin kren ïa la ki jong ki mat ki jongki, hynrei kim dei pat ban lapmiet, ban leit wohkjat ne pyn pohjait ïa la u jong u thylliej, da kaba ki leit wohnia wohdaw ïa kiwei pat, namar ba kane ka jingleh, ka plie lad ïa ki riew paidbah, ba kin nang shim kabu bad ban nang pynheh ïa kito ki jait jingkren kiba pynhiar kyrdan ïa uba kren bad ïa uba shah kren ruh.
Sngew dei hi ban ong ba ïa kino kino ki nongïalam kiba da kren da thew haba ki kren ha ki jingïalang paidbah lane ha ki jingïalang iing, ym ju da don hi kiban kren tam ia ki ruh namar kito kiba kren ruh ki shynrain bad kin shah kynthoh kylla lada ki kren kulmar ïa kum kitei ki nongïalam. Ha kawei pat ka liang, ka la donkam ruh ïa ki kmie ki kpa ba kin peit ba ki khun ba dang khie ba kim dei satia ban shu ïa lapmiet ban ia kynthoh kulmar ha ki rynsan social media da ki kyntien bym long kiba pynhiar dor haduh katta katta ym tang ïa ka iing ka sem khamtam eh ïa ka shnong ka thaw haba tip ba kito kiba kynthoh ki dei ki khun jong kita kita bad ki sah ha kata kata ka shnong.
