Peit ka National Media Team ïa ki sienjam ban pynduhjait ïa ka jingpang TB ha Meghalaya

Shillong, Lber 21: Hapoh ka jingpeit jong ka tnad ka koit ka khiah jong ka sorkar pdeng, ka kynhun ki lad pathai khubor jong ka ri kaba don 8 ngut ki dkhot na New Delhi ki la leit jngoh mynta ka sngi ïa ka Ri-Bhoi district ha Meghalaya ban bishar bniah ïa ki kam ba la pyntreikam hapoh ka kam kaba 100 sngi jong ka sorkar ban pynduhjait ïa ka jingpang TB. Ha kane ka jingleit jngoh, ka kynhun ki nongthoh khubor ka la ïakren bad u Deputy Commissioner, u ophisar ka jylla uba peit ïa ka kam ba ïadei bad ka jingpang TB, u ophisar ka Ri-Bhoi District uba peit ïa ka kam ba ïadei bad ka jingpang TB bad ki nongsumar tynrai.
Haba ïakren bad ki lad pathai khubor, u Deputy Commissioner ka Ri-Bhoi Abhilash Baranwal u la ong ba ka jylla Meghalaya ka la shim ïa ki katto katne ki sienjam hadien ka jingkhot jong u Myntri Rangbah duh ban pynduhjait ïa ka jingpang TB ha ka ri shuwa u snem 2025. U Baranwal u la ong ba da kaba pynïasoh ïa ki nongsumar tynrai bad ki self help group, bun ki nongpang kiba la shah iehnoh mynshuwa na ka jingpeit bniah ïa ka jingpang TB mynta ki ïoh ïa ka jingpeit bniah bad jingsumar na ka bynta kane ka jingpang. U la pyntip sha ki lad pathai khubor ba haduh 10 percent ki shnong ha ka District kim shym la don wat tang uwei ruh uba pang TB ha une u snem ba la dep.
Ka National Media team kan don ha Shillong ha kine ki ar sngi bad kan leit jngoh ïa ki Ayushman Arogya Mandir, ki Primary Health Centre, ka State TB Office bad kin ïa kynduh ïa ki nongpang TB bad ki TB Champion. Ïa kane ka kynhun yn ai jingtip ruh da u Ramkumar S uba dei u Mission Director jong ka National Health Mission na ka bynta ka Jylla Meghalaya.
Ka nongrim: Ka kam kaba 100 sngi ban pynduh jait ïa ka jingpang TB ka dei ka bynta jong ka phang pdeng kaba kham jylliew jong ka prokram National Tuberculosis Elimination Program (NTEP) hapoh ka National Health Mission (NHM), kaba ïahap bad ka National Strategic Plan (NSP) ban pynduhjait ïa ka jingpang TB naduh u snem 2017 haduh u snem 2025. Ka NSP ka peit ïa ka jingpynduna ïa ka jingïoh TB, ka jingpynkhlaiñ ïa ki lad ban wad ïa kane ka jingpang, ka jingpynduna ïa ka por ba donkam ban wad ïa ka jingpang, bad ka jingkyntiew ïa ka jingseisoh jong ka jingai jingsumar, khamtam ha kito ki bynta jong ka imlang sahlang kiba kham don jingma na kane ka jingpang. Kane ka kam kaba kynthup ïa ki 347 tylli ki distrik ha ki 33 tylli ki jylla bad ki union territory, ka dei ka bynta kaba kongsan jong ka buit treikam jong ka India ban pynduhjait ïa ka jingpang TB bad ban tei ïa ka ri kaba lait na ka jingpang TB.