Peit ban rung ka ktien Khasi bad Garo ha ka Khyrnit ba Phra kyrpad u CM ïa u President

Shillong, Jymmang 4 : U Myntri Rangbah ka jylla u Conrad K Sangma ula kyrpad ïa u President ka ri India u Ram Nath Kovind ban peit ba ka ktien Khasi bad Garo kin ïoh ban rung noh ha ka Khyrnit ba Phra jongka Riti Synshar ka Ri.
ïa kane u la ïoh lad ban pynpaw hakhmat u President haba kren ha ka jingïalang bah ba 61 ne ka 61st Annual Conference of Bodo Sahitya Sabha ha Tamulpur, Assam mynta ka sngi ha kaba u President u la wan kum u kongsan.
“ Nga sngew ba ka jingpynrung ïa ki ktien tynrai jong ki jaidbynriew riewlum bapher bapher kane ka thaiñ shatei lam mihngi ha ka Khyrnit ba Phra kan dang wanrah shuh shuh ïa ka jingkhlaiñ ka mynsiem jingïalong kawei ha kane ka ri ba ieit kaba kdup ïa ki spah ne hajar jait ki jaidbynriew” ong u Myntri Rangbah ha katei ka jingïalang.
Ka jingïoh rung ki ktien tynrai jong ki jaidbynriew riewlum kan long ruh kum ka jingïada ïa ki ba kin ym jah ne duh jait hynrei kan dang pynkhlaiñ shuh shuh ïa ka jingithuh ïa ki.
“ Kumta ngi kyrpad ïa phi ban peit ym tang ka ktien Khasi bad Garo kin rung hynrei baroh ki jait ktien jong ki jaidbynriew riewlum bapher bapher na kane ka thaiñ kin ïoh ban rung ha ka Khyrnit ba Phra namar wat la ki dei ki rit paid ne heh paid hynrei ïa ka jingithuh ïa ki lah ban ïohi na ka jingithuh ïa ka ktien kaba ki kren bad pule” ong biang u Myntri Rangbah.
Haba ai jingïaroh ïa ka Bodo Sahitya Sabha u la ong “ Ka ai mynsiem ïa ngi ban ïohi katno ki paralok Bodo ki la pynthikna ba ka ktien jongki kan roi kyrhai”. Ha kane ka sngi la ïadon lang ruh u Myntri Rangbah ka Assam u Himanta Biswa Sarma, u Myntri Rangbah ka Sikkim u Prem Singh Tamang bad kiwei kiwei.