Shillong, Nailur 08: U Lamphang ka Ïingdorbar Thaw aiñ ka jylla u Thomas A Sangma ha ka sngi Nyngkong u la pdiang ïa ka shithi iehnoh kam jong u Deputy Speaker u Timothy D Shira.
Katkum ka jingong jong u Sangma u la ïathuh ba la khot ïa ka jingïalang kaba kyrkieh jong ka Business Advisory Committee (BAC), ha kaba la shim ïa ka rai ban khot pynlong ïa ka election na ka bynta u Deputy Speaker uba thymmai ka ban long ha ka 12 tarik u Nailar.
“Nga la ïohpdiang ïa ka shithi iehnoh kam na u deputy speaker u Timothy D Shira bad nga la pdiang ïa kane ka shithi bad mardor nga la khot ïa ka jingïalang kaba kyrkieh jong ka BAC ban rai bad ban bishar ruh ïa ka calendar jong kane ka Ïingdorbar ha kaba ngin lah ban jied pat ïa u deputy speaker uba thymmai. Na ka liang ka BAC ka la rai ba ka jingkhot ïa ka jingïalang ban jied ïa u deputy speaker uba thymmai kan long ha ka sngi kaba khatduh jong ka Ïingdorbar thaw aiñ,” ïathuh u Lamphang ka Ïingdorbar thaw aiñ ka jylla.
Haba kylli halor ki daw jong ka jingiehnoh kam jong u, u Lamphang u la ong ba u Shira u la pyntip ïa u ba u la ïohpdiang ïa ka jingbthah na ka party high command ba u dei ban hiar shuki noh.
Na ka liang jong u Lamphang u la kyntait ruh ban ïathuh halor kiwei pat ki daw ha kaba ïadei bad kane ka kam bad ong ruh ba ka shong ha ki nongïalam ka seng ban rai na ka bynta ka kam deputy speaker.
