Shillong, K’ Lyngkot 08 : U Hehduh ka Congress ha Meghalaya uba dei ruh u MP barim ka Shillong seat, Bah Vincent H Pala u la pynpaw ba ka party jong u ka kyrshan ïa ka jingthmu ban wanrah ïa ki lynti rel ha ka thain Khasi-Jaintia, hynrei u la ban jur ïa ka jingdonkam ban bishar bniah bad ban ïatai sani bha shwa ban ïaid shakhmat ïa ka kam.
Haba kren halor katei ka phang, u Bah Pala u la pynkynmaw ïa ka jingpyrshang jong u kum u Myntri ha ka Sorkar Pdeng ban ïoh ïa ka jingmynjur na ka bynta ka lynti rel sha ka thain.
“Ha ka por ba nga dang bat kum u Myntri, ngi la ïoh jingmynjur na ka bynta ka lynti rel kaban ïaid ki rel kit mar, kaba thmu ban tehlakam ïa ka jingkiew dor jong ki mar ba kongsan,” u la ong.
Shuh shuh u la ong ruh, “Ka jingpynrung ïa ki lynti rel ka dei kaei kaei kaba kiba bun ki briew ki kwah bad kyrshan.”
U Pala u la pynpaw ïa ki jingeh kiba ka thain ka ïakynduh mynta, kynthup ïa ki jingsiew khajna kaba heh ba la lum ha ki National Highways.
“Ki don kumba 22 tylli ki khyrdop ha shilynter ka surok Assam sha Silchar, kawei kawei ka lum pisa 500-1000 tyngka na ka bynta kawei ka trok, kaba ïarap ïa ka jingkiew dor jong ki marbam ba kongsan ha Meghalaya,” u la ong.
Haba pynpaw ïa ka jingkyrshan ïa katei ka jingtyrwa, u Bah Pala u la banjur ïa ka jingdonkam ban bishar bniah bad ban ïatai nia. “Ngi im ha ka synshar paidbah, bad lada kiba bun kim pdiang ïa ka, ngim lah ban pynbor ïa ka rai,” u la ong. “Ngin sa ïakren bad pyrkhat sani bha ïa ki jingdonkam, katba ka jingmut jingpyrkhat jong ki briew ka nang kylla.”
U Bah Pala u la ai nuksa ïa ki jingkiew ka roi ka pa ha kane ka thain, kynthup ïa ka jingbuh ïa ka kad liengsuin bad ki surok fourlane. “Ngan sngewkmen tam lada ngi lah ban wanrah ïa ki lynti rel na ka bynta ban kit ïa ki mar ba kongsan, ban pynduna ïa ka jingdheng kali ha surok bad ka jinglum khajna beain,” u la ong. U la kdew ruh ba ka dor jong ki marbam mardih ka kham tad dor shibun ha Assam ban ïa kaba don ha Meghalaya.
Tangba u la kdew ruh ïa ka jingsngewkhia halor ka jingktah kaba lah ban mih na ki trai ri trai muluk bad ka riti dustur. “Ngi donkam ban buh ïa ka jingpynïadei hapdeng ka roi ka par bad ka jingpynneh pynsah ïa ka pateng jong ngi,” u la ong.
Da kaba pynpaw ba ki don ki jingmyntoi bad ki jingduhnong ban pyrkhat, u la ong ba ki kynhun seng ki la pynpaw ïa ka jingsngewkhia halor ka jingwan tuid ki briew, hynrei da ki lad leit jingleit kiba mynta kum ki lynti rel, ki liengsuiñ, ki taksi, bad ki trok, ki briew ki la lah ban ïaid kylleng kylleng da kaba suk.
“Kane ka mat ka donkam ïa ka jingïakren kaba bniah, bad ngim lah ban pynkohnguh ne pynbor ïa ka rai kaba ktah ïa ka jingim bad jingïap jong ki briew jong ngi.”
Shuh shuh u la ong, “Ka por kan sa batai, hynrei ngi hap ban shimkhia ban pynthikna ba ïa ki bit ka biang jong ki briew jong ngi yn ïada bad buh hakhmat eh.”
