Shillong, Naitung 12 : U Bah HM Shangpliang MLA ka Mawsynram ha ka sngi ba ar u la pdiang burom ïa ki nongïalam bad nongkyrshan ba radbah jong ka UDP kiba la mih noh ban ai jingkyrshan noh ïa u (HM Shangpliang) ha ka ilekshon MLA 2023. Ïa ki nongïalam bad nongkyrshan jong ka UDP la pdiang burom ha shnong Jyllep ha ka jingïadonlang u Bah Rudy Shangpliang, Bah Khramding Wanñiang, Dwalanroy Snaitang, Bah R. Mawlieh bad kiwei kiwei ki nongïalam.
Ki nongïalam ba hakhmat jong ka UDP kiba la mih noh na ka party ki kynthup ïa u Bah Lamphrang Snaitang uba bat ruh kum u Publicity Secretary ka UDP Mawsynram Circle ha kajuh ka por u Rangbah Shnong ka Shnong Jyllep, ki longkmie longkpa bad ki samla.
U Bah Lamphrang haba ai jingkren ha kane ka sngi u la ïathuh ba ka daw kaba pynlong ïa ki ban mih noh na ka party kadei namar ba kim i don jingkyrmen ïa kane ka party hapoh Mawsynram khamtam ha ki thaiñ khappud. “Ha ki snem ba lah leit noh ngi la pyntyllun ïa ki kam jong ka UDP hapoh Mawsynram hapoh ka jingïalam u Bah Olan Sing Suiñ bad haba ngi phai sha kane ka party hapoh ka jylla bad ha ki katto katne ki jaka jong ka Mawsynram ka long kaba biang hynrei ha ki thaiñ khappud ngi lap ba ka ka UDP kam don jingkyrmen kumta ngi la rai ban mih noh ban ïasohlang noh bad u Bah HM Shangpliang,” ong u Bah Lamphrang da kaba pynpaw ba kim don daw eiei ïa ka party hynrei ki mih da ka mon laitluid.
U la pynpaw ruh ba lada ki dang don ha ka party UDP kin ym lah ban thaw pyrthei khamtam ha kaban wanrah ïa ka roi ka par hapoh ka thaiñ Mawsynram hi baroh kawei.
Na ka liang u Bah Lang u la ïathuh ba ha ka ilekshon 2018 u la kyrshan bor bah ïa u Bah Olan Sing Suiñ bad u sngewthuh ïa ka dor jied nongmihkhmat bad hadien ba u kyrtong u khlem poi sha ka thong u la rai ban mih noh ban pynïasoh noh ïalade bad u Bah HM Shangpliang. “Ban jied nongmihkhmat bunsien dei ban jied ïa u briew uba dei shisha u nongmihkhmat ba shisha, uba peit ïa ka khia ka shon, ka roi ka par khamtam ha ki thaiñ khappud bun ngi dei ki nongrep kumta ban kyntiew ïa ka rep ka riang ngi lap ba dei tang u Bah HM Shangpliang uba lah ban ïarap.”
U la pynskhem ruh ïa kane halor ka jingïoh nong ki nongrep ym tang jong ka thaiñ Mawsynram hynrei wat ka Jylla hi baroh kawei ha kaba ki mar khlaw kynthup naduh u synsar, sla tyrpad bad sohmarit mynta ki la kylla long ki mar rep da ka jingtrei shitom u Bah HM Shangpliang ban kren hapoh ïing dorbar ha kaba ka sorkar ka la mynjur syndon ban ithuh noh ïa ki kum ki mar rep
Na ka liang u Bah HM Shangpliang haba kren pdiang burom u la pynpaw ka jingsngewkmen ïa ka jinglong lakloi jong ki ban wan pynïasoh ïalade na bynta ban ai ka jingkyrshan ha ka ilekshon MLA 2023. U la ïathuh ba ha kine ki saw snem u la leh bun ki kam na bynta ka jingmyntoi jong ki paidbah khamtam na bynta ki nongrep da kaba pynkylla mar rep ïa ki mar khlaw bad ong ruh ba nangne shakhmat un nang ïai trei shitom ban pyndep ïa ki kam ba dang sah la ka long ban wanrah ïa ki lynti ki syngkien, ka umbam umdih bad kiwei kiwei. U kyrmen skhem ba da ka jingïatreilang bad ka jingwan ai jingkyrshan jong ki un sa nang lah ban leh kham bha shuh shuh bad khamtam eh ban ïoh biang ïa ka jingjop ha ka ilekshon ban wan.
