Pdiang sngewbha u MLA ka Mawlai ïa ka hukum ka Meghalaya High Court halor u pud u sam

Shillong, Nohprah : U MLA ka Mawlai u Bah PT Sawkmie hynne ka sngi ula pynpaw ka jingsngewkmen bad pdiang sngewbha ïa ka hukum jong ka Meghalaya High Court badonburom ha kaba ïa dei bad ka jingphah pynsangeh halor ka kam ïa pynbeit pud hapdeng ka Meghalaya bad ka Assam.
“Nga sngewkmen shikatdei eh ba ka ïingbishar Meghalaya High Court ka la phah pynsangeh ïa ka jingpynbeit pud bad ka la phah pynsangeh ruh ban pynïeng ïa ki Mawpud hadien ka jingujor da ki khlieh nongsynshar,” ong u Bah Sawkmie.
Nalor kata ula ong ruh, “Kane ka paw shai ïa ka jingphiel ka sorkar ha kaba ïa dei bad ka Memorandum of Understanding (MoU) ne ka soskular kaba kine ki ar tylli ki jylla ki la ïasoi hapdeng jong ki.”Shuh shuh ula pynpaw ba naduh ka por ba soi ïa ka MoU u sngewthuh ba kam biang satia namar ba bun ki jaka ki leit sha Assam bad bun ki sengbhalang bad kumjuh ki Khlieh Nongsynshar ki pynpaw ïa ka jingbym sngewhun jong ki ha kaba ia dei bad kane ka jingïapynbeit pud.
U pynpaw ruh ba ka sorkar bathymmai ka ban wan ha u 2023 kan hap ban pynduh pyndam ïa ka MoU ba ïa soi ia ka phase banyngkong jong ka Meghalaya bad Assam.
Kum ban shu kdew ka ïingbishar Meghalaya High Court ka la pynmih ïa ka hukum ba ym dei ban sieh mawpud ha ki jaka ïaknieh hapdeng ka Assam- Meghalaya tad haduh ka 6 tarik Rymphang, 2023.
Katkum ka hukum ka ïingbishar ka la pynpaw ha kum kane khep kam dei ban don ka jingpynbeit ïa u pud lane pynieng mawpud ha kitei ki jaka halor ka MoU ba la soi ha ka 29 tarik Lber 2022 tad haduh ban shong bishar biang. Ka Iingkashari ka la buh sngi ban bishar biang ïa kane ka mukotduma ha ka 6 tarik Rymphang, 2023.