Pdiang sngewbha u Dy CM ïa kiba kwah ïakhun na ka Nartiang Constituency kynthup ïa u President ka VPP

Shillong, Kyllalyngkot 30 : U Symbud Myntri Rangbah ka jylla (Deputy Chief Minister) uba dei ruh u MLA jongka 1-Nartiang Constituency u Ma Sniawbhalang Dhar u pdiang sngewbha ïa kino kino ki kyrtong kiba kwah ban ïakhun na ka Constituency jongu ha ka election MLA 2028 kynthup ïa u President ka VPP uba dei u MLA ka Nongkrem u bah Ardent M Basaiawmoit.
“ Nga pdiang sngewbha ïa kino kino kiba thrang ban ïakhun, ym don kano kano ka jingeh namar kane ka dei ka ri Synshar Paidbah kumta mano mano ruh u trai shnong u lah ban wan ïakhun wat la u dei na shabar ka Constituency ruh, kumta uno uno uba kwah nga pdiang sngewbha beit. Naduh ka Congress ka BJP, UDP bad VPP ki lah ban ïakhun ym don kano kano ka jingkhang bad ym don kano kano ka jingeh” ong u ma Sniawbhalang.
Haba la kylli hato ka dei shisha ne em ba u President ka VPP u bah Ardent Basaiawmoit un ïa aireng na ka Nartiang Constituncy u ma Sniawbha u la ong “ Lada u wan ïakhun nga sheptieng ïoh u shah kyntait pat shirta ha ki paid Nongkren, phim lah ban tip ïa kata”. “ Tang kawei kaba nga kwah ban ong ka long ba ngan pynleit jingmut ha kaba shakri hok ïa ki paidbah bad pyndep lut ïa ki kam ba nga dei ban pyndep namar tang ka jingtrei shitom hi kaba donkam ïa nga” ong biang u ma Sniawbha.
Ha kaba ïadei bad ka roi ka par hapoh ka Nartiang Constituency u la ong “ Ngam donkam shuh ban dang batai bniah namar ma phi bad ki paidbah hi ki la ïohi aiu nga la leh ïa ka constituency. Ngam kob ba nga la lah ban pynhun lut ïa baroh ki paidbah jong ka constituency kat kaba ki kwah hynrei ngan ïai pyrshang ban trei bad pyndep ïa ka kamram kum u MLA jong ki paidbah”.
U la pynpaw ruh ka jingshaniah tylli ha ki paidbah “ Ki paidbah ka Nartiang Constituency ki la jied ïa ujuh u MLA kata ïa nga la saw sien kumta kynmaw ba kim dei kiba biej ban shim kano kano ka rai. Kim dei kum ki paid ka Nongkrem Constituency kiba pynkylla MLA man la ka san snem” pynkut u ma Sniawbha.