Shillong, Nailar, 16: Ka Ïing Bishar Meghalaya High Court ha ka sngi Baar ka la pynmih ïa ka jingbthah ba ka sorkar jylla ba ka dei ban peit bniah halor ka jingkynnoh ba ka don ka jingkyntur ki nongdie madan sha ki lynti ïaid kjat bad ka jingkynnoh ba ka don ka jinglum pisa da ki riew shimet na ki nongdie madan.
Ka hukum ba ka la pynmih ka Ïing Bishar ka la ong ruh ba ruh ba ka sorkar ka dei ban peitngor halor ka jingkam ba ka don ka jingkyntur da ki nongdie madan ïa ki lynti ïaid kjat khamtam eh ha Nongbah Shillong bad Tura.
Shuh ka ïing bishar ka la kam ba ka don ka jinglum pisa da ki riew shimet na ki nongdie madan bad ka la bthah ïa ka sorkar jylla kan peit pyrman halor kane bad ban shim da ki lynti kiba tyngeh ruh ïa kito kiba don kti.
Ka Ïing Bishar ka la rai ban shong bishar biang ïa kane ka kam ba ka 24 tarik Nailar namar ka jingbym pat lah ka sorkar ban pynkhreh ïa ki rule ha kaba ïadei bad ki nongdie madan.
Kane ka jingshong bishar ka Meghalaya High Court ka dei hadien ba ka Meghalaya &Greater Shillong Progressive Ha wkers and Street Vendors Association (MGSPHSVA) ka la leit ban tied jingkhang sha ïing bishar.
Hadien ba ka Ïing ka la pynmih ïa kane ka hukum ka seng ki nongdie madan , ka Meghalaya &Greater Shillong Progressive Hawkers and Street Vendors Association (MGSPHSVA), ka pdiang sngewbha ïa kane ka hukum jong ka Meghalaya High Court kaba ka pynmih ha ka sngi Baar kaba la bthah ïa ka Sorkar Jylla ban pynbiang noh ïa ki rule khnang ban pynbeit noh ïa ka kamai ja kpoh jong ki nongdie madan katkum ka Central Act la ïathuh u Bah Shane Thabah Secretary ka seng.
“Kum ka Seng ngi la ïakhun bad dawa mynta la hynriew snem kynthih bad ïakren ruh bad ki bor sorkar halor kane bad ngi la angnud dik dik ban pynurlong noh ia ka Aiñ ka sorkar India khnang ba kan long ka jingmyntoi ïa baroh” ong u Bah Shane.
“Naduh kaba sdang ka seng ka la pynpaw ba ka kloi ban ïatreilang bad ka sorkar namar ngi tip shai ba dei tang ka Aiñ bad ki rule ba biang kiba lah ban pynbeit ïa ka kam ki nongdie madan.
Kine ki rule ki long ban thaw ia ka Town Vending Committee (TVC), ban leh ka insitu survey, ban khein ïa ka jingdon briew bad katno kawei ka jaka ka lah ban shah ïa ki nongdie madan. Nangta, ban kdew ia ki vending zone bad ban batai shai ia ki jaka iew kiba la rim bad kumta ter ter.” u la bynrap.
Haba ïadei bad ka jingkam ba ka don ka jinglum pisa da ki riew shimet na ka liang ka seng ki nongdie madan ki pynpaw ba ba ka seng ka pdiang sngewbha ïa ka jingbthah ka ka sorkar ka dei ban peitngor bha halor kane.
“Ka Seng ka pdiang ruh ia ka jingbthah jong ka High Court ia ki bor Sorkar ban peit ngor ba ïoh don ki briew kiba shim kabu ban lum pisa jubor na ki nongdie madan. Naduh ba la thaw ia ka Seng, ka MGSPHSVA ka la iakhun tyngeh ban rat dyngkhong ia ki riewsniew kiba leh donbor bad shim kabu ia ki nongdie madan” ong shuh shuh u Bah Shane.
