Shillong, Nailur 07: Ka IIM Shillong ka la pdiang sngewbha ïa ka batch kaba nyngkong ha ka Integrated Program in Management (IPM) na ka bynta ka snem pule jong ka 2025-2030. Kane ka prokram kaba 5 snem ka dei kaba la pynwandur kyrpang ha kaba ïadei bad ka pule puthi kaba phai khmat sha ki kam ka IIM bad kumjuh ruh ka jingïohi jngai na ka bynta ki samla ban long ki nongïalam jong ka ri.
Kane ka prokram ka long ruh shi bynta ban ïarap ïa ki samla pule ba kin ïoh ki jinghikai bad kumjuh ruh ban shim ïa ki rai ha ka Post Graduate Program ha ka Management (PGP).
La ong ba ki subjek ki dei ruh halor ki jingpule ban long ki nongïalam bad ki jinghikai ha kaba ïadei bad ka Dharma (righteousness), Vasudhaiva Kutum bakam (the world is one family), bad ka Nishkama Karma (selfless action).
Ka jingpynrung ïa ki samla pule ka la long kaba shongkun lyngba ki jinglah jong ki ha ki kam personal interview. Na ki 30,220 ki aspirant kiba la shim bynta ha ka IPMAT, ki la don kumba 16,357 kiba la ïoh ïa ka kyrdan kaba kham hajrong bad kumba 1,588 ngut ki dei kiba la aplai sha ka IIM Shillong.
