Pdiang ki samla pule ïa ka Yoga, ka jingsaiñdur, bad ka mariang ba la pynlong da ka CBC Shillong

Shillong, Jylliew 21: Kum shi bynta ka jingrakhe ha ka ri baroh kawei shuwa ka International Day of Yoga (IDY) 2025, ka Central Bureau of Communication (CBC) Shillong, kaba hab hapoh ka Tnad Information and Broadcasting, Sorkar India, ka la pynlong ïa ka prokram pynsngewthuh shaphang ka Yoga mynta ka sngi ha Laitumkhrah Assamese Secondary School, Shillong.
Ïa kane ka jingïalang la pynlong ha ryngkat ka jingïatreilang bad ka Meghalaya Yog Samiti ban kyntiew ïa ki jingmyntoi jong ka yoga bad ka bha ka miat ba pura hapdeng ki khynnah skul bad ki briew ba ïadon bynta kad kane ka skul.
Ka phang pdeng jong ka sngi Yoga mynta u snem, “Ka Yoga na ka bynta kawei ka Pyrthei, kawei ka Koit ka Khiah”, ka pyni ïa ka jingïadei jong ka koit ka khiah shimet bad ka rukom im ka bym ktah ïa ka mariang. Ka prokram ka thmu ban kyntiew ïa kane ka jingngeit hapdeng ki samla pule da kaba pynshlur ïa ki jingmlien kiba koit ba khiah, ka jingskhem jingmut, bad ka jingkitkhlieh ïa ka mariang. Ki khynnah skul, ki nonghikai bad ki khynnah ba long dkhot jong ka NCC ba la ïalam da ka nonghikai jong ki, ka Sangeeta Chakraborty ki la ïashim bynta shitrhem ha kane ka prokram Yoga.
La sdang ïa kane ka prokram da ka jingkren pdiang sngewbha na ka Rika Baruah kaba dei ka Principal jong ka Laitumkhrah Assamese Secondary School kaba la pynpaw ka jingsngewnguh ïa kane ka jingshimkhia jong ka CBC Shillong. Ka la ong ba ka yoga ka dei ka atiar kaba khlaiñ ban kyntiew ïa ka rukom im kaba bha bad ka jingpynleit jingmut hapdeng ki khynnah skul, kaba long kaba donkam bha na ka bynta ka jingjop ha ka jingpule bad ka jingkiew shaphrang.
Ïa ka jinghikai la pynïaid da u Nonghikai Yoga u Shiv Sewa, uba la ïalam ïa ki nongïashim bynta lyngba ka Common Yoga Protocol kumba la bthah da ka Tnad AYUSH. Ka jinghikai ka kynthup ïa ki jingkilan ban pynjem met, ki yoga asana ba kongsan kum ka Tadasana, Vrikshasana, Bhujangasana, bad ka Shavasana, kumjuh ruh ki buit Pranayama kum ka Anulom Vilom bad ka Bhramari. La pynkut ïa ka jingleh yoga da ka jingpynleit jingmut shipor. U Shiv Sewa u la pynpaw ïa ki jingmyntoi jong ka jingleh yoga man ka por ha kaba pynbha ïa ka jinglong jem met, pynduna ïa ka jingkhuslai, bad kyntiew ïa ka jinglah pynleit jingmut – khamtam eh kaba myntoi ïa ki khynnah skul ban kyntiew ïa ka jinglah pynleit jingmut bad ka jingleh bha ha ka jingpule.
U Dipankar Nandu, State Secretary jong ka Meghalaya Yog Samiti, u la ai jingkren sha ki khynnah pule bad u la ïasam ba ka yoga kam dei tang ka rukom kilan met, ka dei ka rukom im kaba kyntiew ïa ka jingïatylli hapdeng ka met, ka jingmut jingpyrkhat, bad ka mariang. U la pynshlur ïa ki samla kiba ïashim bynta ban pynlong ïa ka yoga kum ka jingmlien kaba man ka por na ka bynta ka jingkoit jingkhiah kaba neh.
Ban kyntiew ïa ka jingpule bad jingïashim bynta, la pynlong ïa ka jingïakob dro dur halor ka phang pdeng jong ka yoga. Ki khynnah pule ki la pyni ïa ki jingsngew jong ki shaphang ka yoga bad ka jingkoit jingkhiah. Hadien kane ka la don ka Quiz halor ka Yoga bad ka jingtip ba kongsan shaphang ka Meghalaya, kaba la saiñdur khnang ban kyntiew ïa ka jingsngewthuh shaphang ki rukom sumar hyndai jong ka ri India bad ban pynjylliew ïa ka jingsngewthuh jong ki khynnah pule shaphang ka jaka bad ka kolshor jong ka jylla jong ki. La ai khusnam bad ki syrnot sha ki nongjop ha baroh ar tylli ki jingïakob, kum ka jingithuh ïa ka jingtrei shitom bad jingïashim bynta shitrhem jong ki.
Da kaba phaikhmat sa ka mariang ha kane ka prokram, la thung ïa ki diengsoh ha ka phyllaw jong ka skul hapoh ka kam “Ek Ped Maa Ke Naam”. Kane ka la pynskhem ïa ka khubor jong ka jingsumar ïa ka mariang bad burom ïa ka mariang.
Ka prokram pynkhreh ïa ka International Day of Yoga 2025 da ka CBC Shillong ka long kum ka jingsdang kaba don jingmut ïa ka jingrakhe ha kylleng ka pyrthei ha ka 21 tarik Jylliew, kaba la ai mynsiem ïa ki samla ban pdiang ïa ki rukom im kiba koit ba khiah, ban burom ïa ka mariang, bad ban ïai ïasoh bad ki rukom im tynrai jong ka ri India.