Pdiang ki Nongtrei ka GHADC ïa ka jingtyrwa ïarap song pisa ka Sorkar ban ioh tulop man u bnai

Tura, Nailur 22 : Ki Nongtrei ka Garo Hills Autonomous District Council (GHADC) kiba don ha ka lama Non-Gazetted Employees Association (NGEA), kila pdiang ïa ka jingtyrwa song jingïarap pisa ka Sorkar Jylla ban ïarap siew tulop noh ïa ki Nongtrei naduh ka 1 tarik Naiwieng 2025.
Kane ka rai ka NGEA kala mih na ka jingïalang jong ka Sub Committee bala thung da ka Sorkar ban ïakren halor ka jingkyrduh pisa ka Garo Hills Autonomous District Council (GHADC) ba long ha ka sngi Nyngkong, ban lah wanrah ruh ïa ki jingpynkylla bad pynbeit ryntih ïa ka rukom pyndonkam ïa ka pisa pilaiñ hapoh ka Council.
ïa kane ka jingïalang la pynïaid da u Deputy Commissioner ka West garo Hills u Vibhor Agarwal, kaba la ïakren sani halor ka jingtyrwa song jingïarap ka Sorkar-kaba thmu ban weng noh ïa ki jingeh bala neh slem hapoh ka Council, khamtam ka jing bym lah ban siew tulop sha ki nongtrei la bun bun bnai.
Kane ka Sub Committee ka kynthup ruh ïa ki riewpawkhmat kum u Father Januarius Sangma, Reverend Frithing D. Sangma, (rtd) Ophisar MCS Charming N. Sangma bad CEO ka Tura Municipal Board J. R. T. Sangma. ïa ka kynhun NGEA la ïalam da u President Brithen M Sangma bad Timtim N Sangma nalor kiwei kiwei ki dkhot.
Ha ka jingïakren, ki nongtrei ka GHADC kila pynpaw ïa ka jingsngewkhia halor ka jingpynneh ïa ka jinglong laitluid jong ka Council, da kaba sheptieng ba kane ka song jingïarap ka Sorkar kan knieh noh ïa ka jinglong laitluid. U Deputy Commissioner ula kular ha ki ba ka Sorkar kan ym mushlia da lei lei ruh ïa ka jingtreikam ka Council.
Wat hadpeng kine ki jingsngewkhia, ki Nongtrei kila shim pat ïa ka rai ban pdiang ïa kane ka jingtyrwa song jingïarap, haba khmih ïa ka kum ka sienjam bala ap la slem ban wanrah ïa ka jingshngaiñ ha ka pla tyngka. ïa kiba bun, ka kam kam long satia tang halor ka jingsiew khuid ïa ka tulop hynrei ban pynthikna ruh ïa ka rukom siew kaba thikna manla u bnai ha ki por ban dang wan.
U Deputy Commissioner ula pynpaw ruh ba ki nongtrei ka GHADC kiba la mad ïa shibun ki jingeh namar ka jingbym ïoh hok ïa ka tulop, kila pynpaw ba ki kwah ïa ka jingkular bad ka jingsiew ba tista. “Kam dei satia tang halor ka tulop ba sahteng hynrei ka dei ruh halor ka jingpynthikna ïa ka jingsiew ba tista hadien habud. Ha baroh lang, ki nongtrei kila pynpaw ïa ka jingkmen bad kane ka jingtyrwa” ong u Agarwal.
Ula pynpaw ruh ba ka NGEA kan sa ïakren para dkhot halor kane ka kam hashuwa ban ai jubab bad ki mat ba kila pynsngew ruh yn sa leit ban rah sha ka Sorkar Jylla. “Baroh ki jingpynsngew jong ki, yn saphah sha ka Sorkar ba kan pynshai ha ka rukom kaba dei, bad shen yn sa phah ruh ïa ka kaiphod khnang ba ka Sorkar kan lah ban sdang noh ïa ki kam ba donkam ban leh” ula ong.