Shillong, Nohprah, 04: Ka tnat Pule Puthi jong ka Sorkar Jylla ha ka sngi Balang ka la mynjur ban wanrah ïa ka polisi kaba pynskhem ïa ka kam jong ki nonghikai skul SSA ha ka jylla baroh kawei.
Ïa kane la pyntip da u President jong ka Meghalaya SSA School Association (MSSASA) u Bah Aristotle C. Rymbai ha ka jingïakren bad ki lad pathai khubor hadien ba la wai ka jingïalang ba la khot da u Commissioner and Secretary ka tnat Pule Puthi u Vijay Kumar Mantri ryngkat ka jingdonlang jong u Director ka School Education and Literacy u Swapnil Tembe, u Deputy State Project Director u Bah Andrew Warjri.
“Ka jingdawa jong ngi ka long ban wanrah ïa ka polisi kaba pynskhem ïa ka kam jong ngi ki nonghikai SSA hapoh ka jylla Meghalaya kumba la leh ha kiwei pat jylla bad mynta ki la shim ïa ka sienjam ban wanrah ïa kane ka polisi,” ong u Bah Rymbai.
“U Commissioner and Secretary u la pyntip ïa ngi ba na ki phra tylli ki mat ba ngi la aiti ha ka 18 tarik Naiwieng, 2024, ka tnat Pule Puthi ka la pdiang ïa ki san tylli ki mat. Ïa kine ki san tyli ki mat yn sa nang ïathir ïatai shuh shuh ha ka jingïalang ka ban sa long lehse la kumno kumno shwa ka Christmas,” u la ong.
Haba kylli, u la ïathuh ba ki san tylli ki mat jingdawa ba la tyrwa sha ka Sorkar Jylla ki long, ban pyntreikam ïa ka Pay Structure bad ban pynkiew ïa ka jingsiew sha ki nonghikai skul SSA kaba ïaryngkat bad ki nonghikai skul Sorkar, kata, ka jingsiew ïa ka Basic Pay nalor ka DA kaba long katkum ka Revised Pay Structure hapoh ka Meghalaya (Revision of Pay) Rules, 2018. Ban wanrah ïa ka jingpynbeit thymmai ha ka Meghalaya School Education Service Rules. Ban ai jingïarap ïa ki nonghikai skul SSA ynda ki la shongthait. Nalor ka MTET, dei ban pdiang ruh ïa ka CTET na ka bynta ki nonghikai skul SSA kiba shah thungkam hadien ba la pynmih ïa ka jingpynbna jong ka NCTE ha ka 23 08.2010. Ban ym pynlong eksamin MTET na ka bynta ki nonghikai skul SSA kiba shah thungkam shwa ka jingpynmih ïa ka jingpynbna jong ka NCTE ha ka 23.08.2010.
U la ïathuh ba ha kane ka jingïalang, u Commissioner and Secretary u la pyntip ba kim don satia ar kynhun hapdeng ki nonghikai SSA bad ki nonghikai skul Sorkar katkum ki kyndon jong ka Sorkar India hynrei ki nonghikai SSA bad ki nonghikai skul Sorkar ki dei ban don beit tang hapoh kawei ka Management kaba peit hi da ka Sorkar.
“U la pyntip, ha Meghalaya la pyntreikam bakla ïa kane bad dei na kata ka daw ki la mih ar kynhun ki nonghikai SSA bad nonghikai skul Sorkar,” la ïathuh ïa u President ka MSSASA ïa ka jingpyntip jong u Commissioner and Secretary.
“Ka Sorkar Jylla ka la ïoh pdiang shibun ïa ki shithi na ka Ministry of Education ka Sorkar India ha kaba la hukum ban pynbeit ïa kane ka jingbakla. Katkum kine ki shithi bad katkum ki jingdawa jong ngi, mynta ki la shim ïa ka sienjam ban wanrah ïa ka polisi,” la ïathuh u Bah Rymbai.
Haba kylli shuh shuh u la ong, “ka seng ka la bud beit katkum ki kyndon bad ki jingbatai jong ka SSA. Ka kyndon jong ka SSA ka ong ba ïa ki nonghikai dei ban thung ha ki skul Sorkar, hynrei, hangne ha Meghalaya la shu ailad ban thung ha ki skul ba la pynïaid da ki Balang, ha ki skul shimet bad skul shnong. Kaba leh ïa kane, ka dei hi ka jylla jong ngi bad na kata ka daw ka wan ka jingkulmar. Ki kyndon jong ka Sorkar India ka ïapher bad kaei kaba la pyntreikam ha kane ka jylla.”
