Pdiang ka Sorkar ïa jingtyrwa ki Harijan ban pynkynriah sha kawei ka jaka na Them Metor

Shillong, Lber 25: Ka Sorkar Jylla hynne ka sngi thohdieng ka pyntip ba ka pdiang ïa ka rai jong ka Harijan Panchayat Committee (HPC) ban ïakren ha kaban pynïoh bujli da kawei pat ka jaka ban pynkynriah ïa ka Them Metor na Them Iew Mawlong.
“Ngi pdiang ïa ka sienjam ba shim da ka HPC. Nga kwah ban ïathuh ha phi ba shisien ba ngi la pyndep lut ïa ki jing donkam baroh, ngin sa shong haka miej ïakren namar ka jingpynkynriah ka dei beit ban urlong” ong u Bah Prestone Tynsong, Symbud Myntri Rangbah ka Jylla haba ïakren bad ki nongthoh khubor.
Hynrei ula ong pat ba ka Sorkar Jylla ka dang ap ban ïoh pdiang ïa ka hukum na ka Ïingkashari High Court ban pyntyllun shakhmat ïa ka kam.
Ha ka 9 tarik Lber, ka Harijan Panchayat Committee kala ai jingthoh hakhmat ka Ïingkashari ba ka kwah ban ïakren bad ka Sorkar ban ai bujli ïa ka jaka haba pynkynriah ïa ka Them Metor na Them Iew Mawlong bad kane ka kam ka dang don mynta hapoh ka jingbishar jong ka Sorkar Jylla.
Halor kane, ka Ïingkashari kala pynjlan ïa ka jingshong bishar ban ailad ïa ka Sorkar bad ka HPC ba kin ïapynbeit ïa kane ka kam.
Haba kylli, u Bah Prestone ula ong ba ka Sorkar Jylla kam don eiei shuh ban ïakren “Lada phi ong ba kam dei ban don satia ka jingpynkynriah”.
Kat kum ka jingong jong u, ka Sorkar kam don lynti shuh hynrei tang ban pynthikna ba ka jingpynkynriah kan jia kham kloi haba khmih ruh ba kane ka jaka kam long satia kaba ikoit ikhiah bad ba shngaiñ ïa ki Nongshongshnong kiba sah ha kane ka jaka mynta.
“Ka jaka ka long kaba jaboh bha bad ka long palat ïa ka slum bad kam long satia kaba shngaiñ khamtam ïa ki khynnah bad ki riew tynmen” ong u Bah Prestone.
Lah ban kdew hangne, ka Sorkar kala thaw ïa ka High Level Committee ban wad ïa ki lad ki lynti ha kaban lah pynkynriah noh ïa ka Them Metor na Them Iew Mawlong hadien ka jingkulmar kaba jia ha u snem 2018 ha Motphran. Kane ka Committee ka dei kaba khlieh da u Bah Prestone Tynsong.
Halor ka jingai jingmut jong ka HLC bala aiti ha ka 28 tarik Nailur, ka Sorkar Jylla ha ka 29 tarik Risaw kala shimti ïa ka jaka ha Iew Mawlong hadien ka jingsiew ïa ka song pisa ba T. 2 klur sha u Syiem ka Hima Mylliem, da ka jingthmu ban pynkynriah noh ïa ka Them Metor.
Ki lai tylli ki jingai jingmut ba hakhmat eh jong ka High Level Committee ka kynthup ïa ka jingshimti noh ïa ka hok longtrai ïa ka jaka ha Them Iew Mawlong, ban pynkynriah ïa ki Nongtrei ka Shillong Municipal Board (SMB) bad kiwei kiwei ki Tnad lem bad ka jingpynkynriah ïa ki nongshong be-aiñ.
Kat kum ka jinglum jingkheiñ bala aiti da ka Shillong Municipal Bpard, ki don haduh 184 ngut ki Nongtrei sorkar lem bad ki bahaïing hasem jong ki, kiba la ithuh kum ki nongshongshnong bala ïoh jingbit. Kine ki kynthup ïa 128 ngut ki Nongtrei ka SMB bad 56 ngut jong kiwei pat ki Tnad treikam ka Sorkar.
Kumba long mynta, ka SMB kala dep ban pynkynriah ïa ka Ophis jong ka na ki Quarter ban plie lynti ïa ka jing maramot khnang ban ai jaka sah noh ïa ki Nongtrei ba na Them Metor.