Shillong, Jymmang 13: Ka National Peoples Party (NPP) kala pdiang ïa ka jingkop jong ka Liang Pyrshah All India Trinamool Congress (AITC) ban pynliem noh ïa ka party (NPP) na ka bor ha Jylla Meghalaya ha ka elekshon MLA 2023
“Hooid, ngi pdiang ïa kane ka jingkop namar ngi long kiba la pynkhreh ban ïakhun naduh ka mynsiem ha ka elekshon ban wan” ong u National Vice President ka NPP Bah Prestone Tynsong haba ïakren bad ki nongthoh khubor hynne ka sngi thohdieng.
U Bah Prestone uba dei ruh u Symbud Myntri Rangbah ka Jylla ula ong “To ngin sa ïapeit ha ka sngi ba sdang niew ïa ki vote namar ki nongthep vote ka Jylla Meghalaya ki kham stad ban ïakiwei pat”.
U Bah Prestone ula kynthoh ïa kane halor ka jingkam jong u National General Secretary ka AITC u Abhishek Banerjee ba ong ba ka party jong u, kan sa pynliem noh ïa ka Bharatiya Janata Party (BJP) na Tripura bad ka National Peoples Party (NPP) ha Meghalaya, ki ban leit sha ka elekshon MLA ha u snem ban wan.
Haba pynpaw ïa ka jingbym bym mynjur ba kan don ka jingbym mon shuh ïa ka bor synshar jong ka NPP ha u snem 2023, u Symbud Myntri Rangbah ula pynpaw ïa ka jingsngewkhia bad ka Sorkar MDA ba ïalam da ka NPP kan dang ïai bteng ban bat ïa u lakam ka jingsynshar sa lai samoi ha Jylla.
“Ngam mynjur satia. Kaei kata ka jingbym mon shuh ïa ka bor synshar?. Lada ki (AITC) kren ïa ka jingbym mon shuh balei pat ba ka Mamata Banerjee ka dang ïai bteng haduh lai samoi. Ngan ïathuh ïa phi, ka Sorkar MDA ba ïalam da ka NPP kan dang ïai bteng ban bat ïa ka bor synshar sa lai samoi” ula ong.
Halor ka jingkynnoh jong u Vice President ka AITC bad MLA ka Umroi bad George B Lyngdoh ba ka synshar khadar ha Meghalaya kala shong synjor bad ka jingdkoh ba manla ka sngi, u Bah Prestone ula ong “Ai ba u MLA ka Umroi un kdew ïa nga kawei pa kawei ba hangno ka bynta ba ka Sorkar MDA kala pheil. Namar ba ula shu kren kyllum, ngam tip ïa kaei kaba u mut da kaba ong ba ka Sorkar MDA kala pheil. Nga kwah ban tip shai ba ha kano ka bynta ba ka Sorkar kam shym la lah treikam namar ngi la pyrshang katba lah bad ki paidbah ruh kila ïohi ïa kata”.
Haba pynpaw ba kum kine ki jingkynnoh ïa ka Sorkar kin ïai jia beit ha ka snem ïalap elekshon, une u Nongïalam ka NPP ula ong “Kum ka Liang Pyrshah ki dei hi ban kren katba lap lem kumta ka kyrteng jong ki kan sa shu jah rngai”.
