Shillong, Jymmang 06: Ka MSOA ka pdiang bad sngewkmen ïa ka jingphah tohkit ka sorkar jylla lyngba u Conrad K Sangma halor ka jingpynkhreh ïa ka Meghalaya Games 2022.
Ïa kane la pynpaw da u Bah John F Kharshiing uba dei u Working President ka MSOA haba ïakren bad u Mawphor ha SAI Centre hadien bala kut ka jingïalehkai.
“Ka MSOA man ba dep ka jingïalehkai (Meghalaya Games) ngi phah beit ïa ka kaiphod kaba pura bad ngi da kmen palat bad ngi hi ngi la tyrwa ba ngin sa phah ïa ka kaiphod,” ong u Bah John da kaba bynrap ba ka long kaba sngewkmen ban don kum kata khnang ba ban peit bniah ban pynjanai ïa kaei kaba la bakla.
U la ong ruh ba ka MSOA mynta kan hap ban ap ki kaiphod na ki state association bad na ki komiti bapher bapher bad ai por haduh ka 16 tarik Jymmang ba kin pyndep noh khnang ba ka MSOA kan ïoh ban rah sha ka sorkar. U la kubur ruh ba ka la don ka jingbakla hynrei kam dei shuh ban pynlut ïa ka por ban kdew kti hynrei ban nang kham pynjanai shuh shuh ïa kane ka jingïalehkai da ka jingïakren ka MSOA bad ka sorkar.
