Mawkyrwat, Nailar 13: Ka Ranikor Civil Sub Division Sport Association (RCSDSA) ha ka 12 tarik Nailar, 2025 jong ka sngi Ba ar ka la ïoh pdiang ïa ka ‘Provisional Affliaction’ ne ka syrnod jingithuh na ka Meghalaya Football Association (MFA). Da kane ka syrnod ka RCSDSA ka la ïoh ïa ka jingithuh ban long kum kawei naki dkhot kaba la pynïasoh ïalade bad ka synjuk phutbol ba hakhlieh duh jong ka Jylla, ka MFA.
ïa kane ka syrnod la aiti da u President jong ka MFA, u Bah Hamletson Dohling sha u President bad Secretary jong ka Ranikor Civil Sub Division Sport Association haka jingïadon ryngkat lang u Secretary jong ka MFA, u Bah Suresh Syiem.
Kane ka syrnod ym tang ba ka la ai ka jingithuh ïa ka RCSDSA hynrei ka la pynskhem ruh ïa ka ban long ka dkhot ba pura jong MFA, ha kaba ki kynhun lahduh kiba jop nam lahduh ha ki lympung jong ka RCSDSA ki lah ban mih khmat sha ka MSL.
Hashwa ban aiti ïa kane ka Provisional Affliaction, na ka liang u Secretary jong ka MFA u Bah Suresh Syiem u la pynsngew ïa ki kyndon trei kam jong ka MFA bad kyntu ïa ka RCSDSA ba kin bud ryntih ïa ki kyndon treikam khnang ba kan ym don ka jingthud.
Ha kajuh ka por la ïoh ruh ban pynskhem pura ïa ki nongkit kam jong ka Association da ka jingsakhi lang u President ka MFA u Bah Hamletson Dohling, Bah S Syiem Secretary MFA ki dkhot jong ka MFA, u Bah Y G Diengdoh Working President jong ka Mawkyrwat District Sports Association, u Bah H S Diengdoh u ba dei u Nongïalam ba Nyngkong ban sdang ïa ka RCSDSA, ki heh nongïalam bapher bapher lem bad ki Sports Club bapher jong ka Ranikor Civil Sub Division.
