Pdiang ka Lok Sabha ïa ka Resolution ban pynïoh biang ïa ka jingsuk ha Manipur

Shillong, Nailar 09 : Ka Lok Sabha ha ka sngi Balang ka la pdiang ïa ka Resolution ban pynïoh biang ïa ka jingsuk ha Manipur ha kaba ki MP jong ka National Democratic Alliance ki la kyrshan lut ha ryngkat ka jingdonlang ka Liang Pyrshah.
Shwa kane, u Myntri Kampohïing ka Ri, u Amit Shah u la kyntu ïa baroh ban trei lang khnang ba yn dup lah ban pynkut noh ïa katei ka jingkynad kaba la neh la palat lai bnai ha Manipur. U Amit Shah u la kyntu ïa baroh arliang mamla, kata ïa ki Meitei bad kumjuh ïa ki Kuki ba kin wan sha ka miej jingïakren namarba ka Lok Sabha ruh ka la pdiang da ka Resolution na kabynta ban pynïoh biang ïaka suk ka sain ha katei ka jylla kaba don ha ka thain shatei lam-mihngi jong ka Ri.
Da kaba knieh ktien ha ka jingiatai halor ka no – confidence motion hadien ba u Rahul Gandhi bad ka Liang Pyrshah ki la kynthoh ïa ka rukom leh jong ka sorkar ban tehlakam ïa ka jingjia ha Manipur, u Myntri Kampohïing ka Ri u la kyntu ruh ba ym dei satia ban leh politik ïa katei ka jingïakynad jaidbynriew ha katei ka jylla.
“Nga mynjur bad ka Liang Pyrshah ba ka jingïakynad ha Manipur ka dang ïai bteng.. Ym don satia hi ruh kiban kyrshan ïa kum kitei ki jingjia hynrei kaei kaba la jia kadei kaba la palat kumta ban pynlong ishu politik pat ïa kum kitei ki jingjia kadei kaba khan shyrkhei shuh shuh,” ong u Amit Shah.
Katkum ka jingïathuh da u Myntri Kampohïing ki la don haduh 152 ngut ki briew kiba la khlad, 14898 ngut kiba la shah kem bad 1,108 tylli ki FIR kiba la rejistar naduh ba katei ka jingkynad ka la sdang ha ka 03tarik u Jymmang.
Ha katei ka jingkren jong u kaba la neh haduh kumba ar kynta ei ei, u Shah u la ong ba u Myntri Rangbah ka Manipur u la ai ka jingïatrei lang bad ka sorkar pdeng ha ka jingpyrshang ban wanrah biang ïa ka suk ka sain. Da kaba kdew ïa ka video kaba jia ha ka 04tarik u Jymmang ha kaba arngut ki longkmie ki shah thombor bad shah pynïaid khlem jain ha ki paidbah, kaba la saphriang pat ha ka 19tarik Naitung u Shah u la ong ba ka sorkar kam tip ei ei ïa ka.
U ong ruh ba jin da lada ïa katei ka video la ai sha u Director General of Police ka jylla ha jaka ban pynsaphriang ha ki social media lehse kan ïarap ban ïoh kem ïa kito kiba donkti ha ka por kaba biang. Da kaba buh jingkylli kumno katei ka video ka saphriang shisngi shwa ka Dorbar, u Shah u la pynti ruh ba la ïoh ban kem 9 ngut ki briew kiba suba donkti.
U Myntri Kampohïing u ïai ban ruh ïa kitei ki arliang mamla ba kin sangeh noh ki kam pynibor hynrei ban phaikhmat noh sha ka miej kren ïa suk.
“Nga kyntu ïa baroh ar kynhun (Kuki bad Meitei) ba kin shong lang bad ka sorkar pdeng ban pynbeit ïa kano kano ka ishu,” u la bynrap biang.
Shwa kane, u Shah u la ong ruh ba katei ka jingïa umsnam kaba sdang naduh ka 03tarik Jymmang ka la ïai bteng haduh mynta bad na ka liang ka sorkar ruh ka la thaw ïa ki komiti pynneh jingsuk kum shi bynta ban wallam biang ïaka suk ka sain ha ka jylla.
“Ki la don palat 36,000 ngut ki bor pahara kiba la buh hapdeng ki Kuki bad Meitei. Watla ka jingkhihwin kam pat kut hynrei ka jingpynibor ka la kham thanda,” u la bynrap biang.