Pdiang ka Lok Ayukta ïa ka jingujor u Bah Adelbert halor ka Saubhagya Scheme
23 tarik, Naitung khot ïa u heh ka Megh Legislative Assembly
Shillong, Jylliew, 27: Ka Meghalaya Lokayukta ka la pdiang ïa ka jingai jingujor jong u MLA ka Voice of People’s Party (VPP) ka North Shillong Constituency Bah Adelbert Nongrum uba la ujor pyrshah ïa ki shiphew ngut ki ophisar ka Sorkar Jylla ha kaba la kynnoh ba ka don ka jingpyndonkam bakla ïa ka pisa jong u paidbah ha kaba ïadei bad ka jingpyntreikam ïa ka Saubhagya scheme.
U Bah Nongrum u la ujor hapoh ka Section 13(1) (a) jong ka Prevention of Corruption Act, 1988 pyrshah ïa ki shakri sorkar kiba don ha ka bor ha u snem 2018.
Ka Meghalaya Lokayukta ka la phah ktien ruh sha ki nongshah ujor ba la buh sngi ban shong bishar ïa kane ka jingujor ha ka 23 tarik, Naitung, 2024 ha ka por 2:00 baje noh sngi.
“Namarba ki jingkynnoh ha ka jingmudui ba la ujor beit halor ka kaiphod jong u Comptroller and Auditor General of India (CAG) ïa kaba la phah sha ka Meghalaya Legislative Assembly, ïa ka notis ryngkat bad ka kopi jingujor la phah ruh sha u Commissioner and Secretary, Meghalaya Legislative Assembly,” la ong ka hukum ba la pynmih da u Chairperson ka Meghalaya Lokayukta u Bah Bhalang Dhar.
Kum ban shu pynkynmaw ka jingujor ka long pyrshah ïa u Chief Secretary barim, u Additional Chief Secretary (Power) Chairman cum Managing Director (CMD) barim jong ka MeECL bad ïa ki ophisar barim jong ka MePDCL ba kynthup ïa u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad Additional Chief Engineer (Planning & Design).
Ïa ka jingujor la shim katkum ka kaiphod jong u Comptroller and Auditor General of India halor ka Social and Economic Sectors na ka bynta u snem kaba kut haduh ka 31 tarik, Lber, 2022.