Shillong, Nailur, 11: Ka Kynhun Myntri jong ka jylla ka la pdiang ïa ka kaiphod jong ka Independent Inquiry Committee kaba la thaw ban tohkit ïa ki jingkynnoh kiba ïadei bad ka jingthied tiar, ka jingduhnong ha ka Aggregate Technical & Commercial (AT&C), bad ka don nongtrei ha ka Meghalaya Energy Corporation Limited (MeECL) bad ki lai tylli ki kompeni synrop jong ka.
Ka kaiphod jong ka Independent Inquiry Committee ka la ai ruh bun tylli ki jingai jingmut ban pynjanai ïa ka jingtreikam jong ka MeECL bad ki shnat treikam jong ka.
“Hadien ba la pdiang ïa kane ka kaiphod, ka Kynhun Myntri ka la bthah ïa ka tnad Bording ban pynthikna ba baroh ki sienjam kin long ban pyntreikam ïa ki jingai jingmut bapher bapher kiba la ai da kane ka komiti tohkit,” ong u Myntri Rangbah ka Jylla u Conrad K Sangma haba ïakren bad ki lad pathai khubor hadien ba la wai ka jingïalang Kynhun Myntri ha ka sngi Palei.
U Sangma u la kular ba ïa ka kaiphod jong ka Inquiry Committee yn sa pyni paidbah ha ka website jong ka Sorkar ha ki ar sngi ban sa wan, khang ban ailad ïa ki paidbah ba kin tip ïa ki jingshem bad ïa ki jingai jingmut.
