Khliehriat, Lber, 14: Ki jingpyntip na ka Balang Presbyterian Sutnga, kaba don hapoh ka Presbytery Sutnga, kaba pdiang mynta ïa ka Jingïaseng Synod Mihngi kaba ar phew lai, ka Balang ka la buh ïa ki jingpynbna kiba donkam bad jingpyntip sha baroh ki paidbah ki ban wan sha kane ka jingïaseng Synod kaba la sdang naduh ka 13 tarik u lber haduh ka 16 tarik u lber.
U Rev. R.K.Sutnga, uba dei u pastor incharge jong ka Balang Sutnga u la ong “Kum ka Balang ngi ai nguh ïa u Blei ba kum ka balang ka la pdiang ïa ka Synod Rangbah mynta la san sien, kata ha u snem 1963, 1976, 1986 bad 2004 ha ka por ba ka synod ka dang long lang kawei bad mynta pat ka la pdiang sa ïa kane ka synod kaba san hapoh ka balang, kum ka balang ka ainguh ba u Blei u la ïalam ïa ka Balang ha ka jingpynkhreh jong ka balang ban pdiang ïa kane ka jingïaseng synod kaba arphewlai hapoh ka balang”
Ka jingpdiang ïa ki nongwan sha kane ka jingïaseng kaba naduh ki nongkitkam, ki dkhot bad ki delegates baroh, na ka liang ka balang ka la pynbeit ban pdiang ïa kine baroh ha madan ha ïew Kyllaw kaba don syndah bad ka ïing dorbar hall jong ka elaka Sutnga, kumta ka Balang ka kyrpad ïa ki nongkitkam , ki dkhot, ki delegate baroh ba kin sngewbha ban ïa wan sha kane ka jaka ba la pynkhreh khnang ba ki volunteer kin ïoh ban leit buh ïa ki sha ka jaka sah, ha kaba ïadei pat bad ka jingïaseng paidbah ka ban long ha ka sngi u Trai, ka balang ka pdiang sngewbha ïa baroh ki parabangeit baieid jong ka Khasi, Jaiñtia Presbnterian Synod, mihngi bad kiba na kiwei kiwei ki Synod bad kumjuh ruh kiba na kiwei ki kynhun balang ruh ka Balang ka pdiang sngewbha ïa baroh kum shibynta ban shakri ïa u Blei.
Ha kaba ïadei bad ka jaka ieng kali na ka bynta ka sngi u trai, ka Balang ka la pynbeit bad ki jaka ieng kali baroh ki don hapoh u pud u sam jong ka shnong Sutnga, kiba jngai tang kumba lai, san, phra minit na ka jaka ban pynlong ïa kane ka jingïaseng bad ka jaka ieng kali ruh ka pahuh bad la kyrpad ba ynda ki la poi ha Lad Sutnga ba ha shwa ban rung shapoh ka shnong Sutnga, ki la don lypa ki khilon kiba don ha ki ar tylli ki lad bad kine ki lad ki dei ki ban pynpoi sha ka pandal ban pynlong jingïaseng.
La kyrpad ruh ïa kiba ñiah kali ba kim dei ban overtake khnang ban lait na ka jingdheng kali khnang ba baroh ki riew ngeit ki ban wan sha kane ka jingïaseng kin poi da kaba suk sha ka jingïaseng.
Ka Balang kan nym shah ïa kino kino kiba wan ïa die, ïa thied ha ka sngi u Blei kynthup ki nong die madan namar ki rynpei ïing kristan hi ki la pynkhreh na ka bynta ki jingbam, ka sha ka ja na ka bynta kiba wan sha kane ka jingïaseng Synod, ka balang ka buh ha ki jingdwai ba u Blei un don lang, don ryngkat bad baroh kiba wan sha ka Jingïaseng kiba mih na la ki jong ki balang ba kin poi suk sha ka balang Sutnga haduh ba kin da leit phai suk ruh sha ki ïing ki sem, ka Balang ka dwai ruh ba u Blei un don ryngkat bad ka Balang kaba la pdiang ïa kane ka jingïaseng synod kaba arphewlai.
