Nongpoh, Nailar 22 : Ka long shisha ka jingsngew sarong ïaka jylla Meghalaya hadien ba 2 ngut ki samla kynthei kila ioh ban khur 3 tylli ki takma naka jingïakhun Muay Thai kaba la tip kum ka Youth IFMA Championship of Muay Thai kaba la sdang naduh ka 9 haduh ka 20 tarik Naitung ha Kuala Lumpur, Malaysia.
Ha katei ka jingïakop 5 ngut ki samla naka jylla Meghalaya kila leit ban mihkhmat ïaka ri India ba kynthup ïaka Mary Christine Wriang kaba la ïakhun haka kyrdan 38 kg kiba hapoh ka 14 snem bad 15 snem, ka Alphonesa Zinia Wriang haka kyrdan 36kg kiba hapoh 12 snem bad 13 snem, u Everestar Lyngdoh haka kyrdan 48 kg kiba hapoh 14 snem bad 15 snem, U Bansahnam kyrpang Warkhyllew haka kyrdan 45 kg kiba hapoh 14 snem bad 15 snem bad ka Naphilawanbet Nongspung haka kyrdan 45 kg kiba hapoh 14 snem bad 15 snem bala lamkhmat da u bah Angelus Sun, u President ka Muay Thai Association of Meghalaya (MTAM).
Napdeng kitei 5 ngut ki nongïakhun 2 ngut ki samla naka jylla kila ioh ban khur takma ba kynthup ïaka Mary Christine Wriang ka la ioh ban khur ïa ka takma Rupa ha ka jing ïakhun pyrshah bad ka snar nongïalehkai jong ka Philipine bad ka la ioh ruh ban khur ïa ka takma rnong haka jingïalehkai Wai-Kru, katba ka Samla Alphonesa Zinia Wriang ka la ioh ban khur ïa ka takma rnong ha ka jingïalehkai wai-kru.
Ïa kitei ki 5 ngut ki nongïalehkai muay thai ka jylla la pdiang burom da ka RBYF mynta ka sngi ha Nongpoh hapoh ka jingïalam jong u Bah P Kylla Finance Secretary ka RBYF Sengkmie, u Bah Bawantippor Marweiñ Sports Secretary, Samla Aristone Manbha Ryndongsngi President ka RBYF Nongpoh Circle da ki jaiñ bad ki syntiew ki skud kum ka jingsngewsarong.
