Pdiang burom ka Meghalaya Weightlifting Association ïa ka samla Larityngkai ha Nongpoh

Nongpoh, Lber 31: Ka Meghalaya Weightlifting Association mynta ka sngi kala pdiang bad pynkup burom ïa ka samla Larityngkai Lawriniang, ka nongïalehkai weightlifting ka jylla na Mairang, kaba la wanrah burom ïa ka jylla hadien ka jingïoh khur takma ha ka Khelo India Tribal Games 2026 kaba la long ha Chhattisgarh.
Ka Larityngkai ka la mihkhmat ïa Meghalaya ha ka jingïakhun ha ka kyrdan 53 kg, ha kaba ka la ioh khur ïaka kyrdan ba 3 da kaba kamai 132 point, watla ka la ïakhun tyngeh pyrshah ïa ki nongïalehkai na Odisha bad Manipur.
Napdeng saw ngut ki nongïalehkai kiba la mihkhmat ïa ka jylla, dei tang kane ka samla kaba la ioh ban khur takma, kaba dei ruh ka takma kaba nyngkong ïaka jylla Meghalaya ha kane ka lympung.
Kane ka jingjop katei ka samla ka la pynlong ïa ka Association ban dap da ka jingkmen bad mynta ka sngi kala pdiang bad pynkup burom ha Indoor Stadium Nongpoh, hapoh ka jingïalam u President u Bah Donald Rymbai, kum ka jingai mynsiem ïa ka jingtrei shitom bad jingïakhun tyngeh jong ka.
Ka samla ka dei ruh kaba la shah pyntbit ha Shillong hapoh ka prokram Sports Talent Sportality lyngba ka jingïatreilang bad ka Meghalaya Weightlifting Association, kaba la kyrshan ïa ka ha ka jingïaid lynti jong ka.
Ha kane ka jingïalang, la wan sakhi lang da ki riew pawkhmat kynthup ïa u MLA ka Nongpoh u Bah Mayralborn Syiem, u Bah Mathew Makdoh nominated MDC, u Bah Flanagan Kharwanlang Vice President, u Bah Phrang Kupar Sawkmie, bad kiwei pat kiba la ai jingïaroh ïa kane ka samla kaba la wanrah nam ïa ka jylla.