Jowai, Jymmang 07: Ka Jaiñtia Students Movement (JSM) Central Body mynta ka ngi kila pdiang burom ïa ki rang ïalehkai ka West Jaiñtia District Sports Association (WJDSA) kiba la wan ban ïashim bynta ha ka Meghalaya Game 2022 da kaba wanrah shibun ki takma ha ki kyrdan bapher bapher.
Na ka liang ka JSM Nartiang Circle bad ka Kur Pale ha kane ka sngi kila pynkup burom ïa uwei na ki rang ïalehkai u Santify Pale ha ryngkat ka jingdon lang ki dkhot ka WJDSA kaba la long ha Mookyndur hajan ka kilon ‘Welcome to Jaiñtia Hills’, shuh shuh utei u samla uba dei na ka shnong Moodop, Nartiang WJHD uba la ïoh khur haduh ar tylli ki takma ksiar kata haka jingïakop mareh 800 Meters bad 1500 Meters.
La ïathuh ba na ka liang ka WJDSA kala ïohlad ban phah ïa ki nongïalehkai sha kane ka lympung ha ki kyrdan kum ka Athletics, Football, Basketball bad ka Archery, ha ka Athletics kila ïoh khur haduh 6 tylli ki takma ksiar, 8 tylli ki takma rupa bad 7 ki takma Rnong bad kiba la ïoh ruh ïa ka kyrdan ‘Runners Up’ na ka liang ki shynrang. Ha ka Archery kila ïoh 2 tylli ki takma ksiar bad kawei ka rupa, katba haka phutbol kila ïoh ha ka kyrdan jong ka takma rnong .
