Pdiang burom ka HSPDP Mawthadraishan ïa ki rangbah, longkmie bad samla

Nongstoiñ, Lber 29: Ka Hill State People Democratic Party Mawthadraishan ha ka sngi a ba ar ka la sdang ïa ka lympung paidbah da ka jingïalang ha ka madan jong ka shnong Mawkyllei kaba dei ka shnong kaba la pun la kha ïa u (L) bah Hopingstone Lyngdoh uba dei u nongseng jong ka party, na ka bynta ban pdiang burom ïa ki riew rangbah kiba la wan pynïasoh sha ka party, hapoh ka jingïalam jong u bah Wallyson Sohlang, u ba dei ruh u Acting Chief barim ka Hima Myrïaw, u bah Kotbor Warjri u ba dei u nongkyrshan ba radbah jong ka UDP bad kiwei kiwei.
Nalor kata ïa ki longkmie kiba la wan ban pynïasoh sha ka HSPDP la ïalam da I kong Irin Lyngdoh MLA/MDC barim na ka party Congress I ba la long teng ruh I Myntri ha ka sorkar jylla.
La pynïaid ïa ka jingïalang da u bah B.K.Budnah Secretary ka HSPDP Mawthadraishan Constituency ha ryngkat ka jingïadon lang jong u bah K.P.Pangñiang President rangbah ka party, u bah Shakliar Warjri u ba dei u kyrtong u ban ïakhun ïa ka election ha u 2023, u bah Sandondor Ryntathiang President ka Youth Wing central body, ki nongkitkam jong ka HSPDP West Khasi Hills District bad paidbah nongkyrshan jong ka party.
Ha katei ka sngi shuwa ban sdang ïa ka jingïalang ban pynkup burom ïa ki riew rangbah, ki longkmie bad ki samla kiba la wan rung sha ka party, kum ka dak jong ka jingkynmaw burom ïa u (L) Maieit Hopingstone Lyngdoh u nongseng jong ka party, u bah K.P.Pangñiang ryngkat ki nongïalam bad ki riew rangbah ki la leit ban buh syntiew ha u mot sah jingkynmaw u ba la tei ha khmat jong ka Mawkyllei College, kaba dei ka matti kaba kyrpang kaba u (L) maieit Hoping u la seng.
I kong Irin Lyngdoh ha ba kren ha ka jingïalang, I la pynkynmaw ba ha ka por ba u (L) bah Hopingstone Lyngdoh bad ma I ki dang ïadon lang ha Assembly ha ki kynta kylli jingkylli, baroh ki nongmihkhmat ki rkhie ïap ler namar haba u (L) bah Hopingstone Lyngdoh u ba dei na ka juh ka ïing ka sem u kylli jingkylli, la jubab da I kong Irin Lyngdoh bad haba I kong Irin Lyndoh I kylli jingkylli la jubab da u (L) bah Hopingstone Lyngdoh.
I la pynkynmaw ruh ba ha Assembly ki ïa thalaiñ iwei ïa iwei haduh ba thnam shait ka Ïing dorbar, namar ka jingïania jong ki katba ha ïing ha sem pat ki ïaieit bha. I la ong ba mynshuwa namar ba I don ha ka party Congress im ju kwah ba ka party HSPDP kan jop na Mawthadraishan. Hynrei hadien ba ka Congress ka la kynjat noh ïa I, im shym la leit pynïasoh sha kiwei ki party bad dei tad haduh mynta, ba ma I ryngkat ki nongkyrshan baroh ki la rai ban phai noh sha ka HSPDP, namar lada kin leit pynïasoh bad kiwei ki party ki ngeit ba kan pynsngewsih ïa u (L) Maieit Hopingstone Lyngdoh. I la ong ruh ba u Sing un kyrhuh jam bha mynta ka kynti bad ha ka kyrteng ka party HSPDP yn thaw ïa ka sorkar ha ka Jylla ha u 2023.
U bah Pangñiang haba kren ha katei ka sngi u la pynkynmaw ba ïa ka jylla ba pura la ïoh lyngba ka jingïalam jong u (L) Bah Hopingstone Lyngdoh bad ka jingshah set phatok jong ki lai spah tam ki Volunteer. U la pynkynmaw ruh ba ka HSPDP ka la kynjoh mynta san phew lai snem naduh ba la seng ïa ka, hynrei ka jylla pat ka dang kynjoh tang sanphew snem kata ha ka 21 tarik u Kyllalyngkot jong une u snem bad lymda dei na ki kyntien shong sbai bad kit jingmut kiba la pyrta da ki Volunteer kiba ong “No hill state no rest no hillstate direct action”, ka jingïoh ïa kane ka jylla ba pura lehse wat tang ar phew snem ruh kam pat dap.
U la ong ba lada ka Jaidbynriew Khasi Pnar ka kynmaw ïa ki jingshah shitom jong ki longshuwa hapoh phatok na ka bynta ban pynïoh ïa ka jylla ba pura, ki la dei ban pyrkhat sani kaei kaba ki dei ban leh kum ka dak jong ka jingburom ïa ka party bad ki nongïaleh hill state, namar baroh ki nongïalam jong ka party ki don ïa ka thong ban wanrah ïa ka jingkylla bad ba ka jaidbynriew kan tyngshaiñ sa shisien pat ha kane ka ri tip briew tip blei.